Namanganda 61-xalqaro gullar festivali doirasida ilk marotaba Farg‘ona vodiysi moda haftaligi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Ushbu haftalik Farg‘ona vodiysi yosh dizaynerlarining xalqaro tanlovi final bosqichi, tikuvchilik korxonalari, dizayn-studiyalar, reklama agentliklari vakillari uchun amaliy seminar, moda mahsulotlarini internet texnologiyalari yordamida ilgari surish bo‘yicha trening va professional dizaynerlar kolleksiyalari ko‘rigini o‘z ichiga oldi.
“Biz ushbu tajriba Farg‘ona vodiysi mintaqalari — O‘zbekistonda Farg‘ona, Andijon va Namangan, Qirg‘izistonda Batken, Jalolobod va O‘sh, Tojikistonda So‘g‘d viloyatida istiqomat qiluvchi yosh dizaynerlar iste’dodini yuzaga chiqarish, ular tomonidan tayyorlanayotgan ijod namunalariga e’tibor qaratish uchun o‘ziga xos imkoniyat deb hisoblaymiz. Qolaversa, davlatlar o‘rtasida transchegaraviy hamkorlikni yo‘lga qo‘yishning eng yaxshi namunalaridan biri”, — deydi loyiha rahbari Natalya Garbuz.
Namangandagi modalar haftaligida O‘zbekiston, Qirg‘iziston va Tojikistonda bo‘lib o‘tgan yosh dizaynerlar tanlovlarining g‘oliblari ishtirok etdi. Ular final bosqichida tomoshabinlarga o‘zlari tayyorlagan turfa uslubdagi kiyim-kechak namunalarini taqdim etdi.
“Ikki hafta davom etadigan xalqaro gullar festivalining har bir kunini madaniy, ko‘ngilochar tadbirlar bilan boyitishni rejalashtirgandik. Shu ma’noda Farg‘ona vodiysi moda haftaligi Namanganda o‘tkazilayotgani ayni muddao bo‘ldi. Biz bu haftalik an’anaviy ko‘rinish olishi tarafdorimiz, har yili festivalimiz davomida mezbonlik qilishga tayyormiz”, — dedi tadbirda ishtirok etgan viloyat hokimi Shavkat Abdurazzoqov.
Final bosqichida ishtirokchilarga “Milliy liboslarda etnika va zamonaviy moda” tanlovining O‘zbekiston, Qirg‘iziston va Tojikiston bosqichlari g‘olibi sifatida birinchi, ikkinchi va uchinchi darajali diplomlar taqdim etildi. Qirg‘izistonlik yosh dizayner Nuriya Qashqarboyeva esa Gran-pri sohibasi deb topildi.
Gala-shouda O‘zbekiston, Qirg‘iziston, Tojikiston, Germaniya va Rossiyada faoliyat olib borayotgan professional dizaynerlar kolleksiyalari namoyishi bo‘lib o‘tdi. Tomoshabinlar etnik uslubda yuksak mahorat bilan tayyorlangan rang-barang liboslarni ko‘rish va baholash imkoniyatiga ega bo‘ldi.
Haftalik yakunida Oliy Majlis huzuridagi Jamoat fondi hamda USAID tomonidan moliyalashtirilgan tadbir tashkilotchisi bo‘lgan “Kelajak bugundan boshlanadi” jamoat birlashmasi Namangan viloyati bo‘limi va “O‘zto‘qimachiliksanoat” uyushmasi, Savdo-sanoat palatasi, Namangan muhandislik-texnologiya instituti, “Samo” bolalar ijodiyoti akademiyasi kabi hamkor tashkilotlarga mezbonlar tomonidan minnatdorlik bildirildi.
Izoh (0)