Тошкент шаҳридаги жамоат транспортларига чиқиш-тушишда янгича тартиб ўрнатилгани, унга кўра энди йўловчилар автобуснинг олд эшигидан чиқиб, орқа эшигидан тушиши тўғрисида хабар берилганди. «Тошшаҳартрансхизмат» мазкур янгича тартибга изоҳ берди.
Жамоат транспортида (автобуслар ва электробуслар) жорий этилаётган янги тартиб қоидага асосан, йўловчилар автобус ва электробусларнинг салонига фақат олд эшикдан ҳайдовчининг ёнида ўрнатилган махсус валидатор ва қурилма орқали йўл ҳақи учун тўловни амалга оширгандан сўнг киришлари ҳамда салондан тушаётганларида ўрта ва орқа эшиклардан фойдаланишлари керак.
Ушбу тартиб-қоида хорижий давлатлар тажрибасидан келиб чиққан ҳолда жамоат транспортида йўловчилар ҳаракатини тартибга солиш, транспорт маданиятини янада ошириш ва йўловчилар ташишдан тушадиган даромадлар шаффофлигини таъминлаш мақсадида жорий этилмоқда.
Шунингдек, пойтахт бўйлаб ҳаракатланувчи автобус йўналишларида мазкур тартиб қоида белгиланган режа асосида босқичма-босқич, яъни биринчилардан бўлиб белгиланган йўналиш жадваллари сони тўлиқ бўлган, ҳаракат давомида оралиқ интервали қисқа бўлган автобус йўналишларида жорий этилмоқда. Хусусан, ҳозирда 51-сонли автобус йўналишида (Yutong русумли электробус)да жорий этилган.
Ўзбекистон президентининг тегишли қарорига асосан 2022 йил якунига қадар 20 дона электробус, 190 дона катта сиғимли, 200 дона ўрта сиғимли автобуслар харид қилиш орқали «Тошшаҳартрансхизмат» АЖ ҳаракат таркибини янгилаш белгиланган. Ҳозирги кунга қадар 20 дона электробус ва 30 дона SAZ LE-60 русумли ўрта сиғимли автобуслар харид қилинган ва 51,81, 98, 17Т, 32-сонли йўналишларга тасарруф этилган.
«Йил якунига қадар яна 360 дона катта ва ўрта сиғимли автобуслар харид қилиниши ва пойтахт кўчаларида ҳаракатланувчи автобус йўналишларида тасарруф этилишини инобатга олиб, оралиқ интервали қисқа ва белгиланган режа асосида жадваллар сони тўлиқ бўлган автобус йўналишларида мазкур тартиб қоида жорий этиб борилишини маълум қиламиз», — дейилади хабарда.
Эслатиб ўтамиз, 2022 йилнинг май ойигача Тошкент автобуслари кондуктор иштирокисиз нақд тўловни онлайн қайд қилиш тизими билан жиҳозланади. Таъкидланишича, хизмат кўрсатиш сифатидан келиб чиққан ҳолда жамоат транспортини молиялаштиришнинг янги тизимига ўтиш президент қарори билан кўзда тутилган.
Изоҳ (0)