АҚШ Оролбўйи аҳолиси учун тиббий асбоб-ускуналар ва анжомларни ўз ичига олган гуманитар ёрдамни юборди

Қорақалпоғистонга июнь ойида АҚШдан тиббий буюмларини ўз ичига олган тўртта контейнерда гуманитар ёрдам олиб келинади. Бу ҳақда «Дунё» агентлиги хабар берди. Товарларни топшириш ва етказиб бериш АҚШда жойлашган Project C.U.R.E. хайрия лойиҳаси томонидан Ўзбекистоннинг Вашингтондаги элчихонаси кўмагида амалга оширилмоқда.

Умумий оғирлиги 16,8 тоннани ташкил этадиган гуманитар ёрдамнинг ичидан 2,9 минг қути тиббий товарлар ўрин олган бўлиб, июнь ойида улар Қорақалпоғистон соғлиқни сақлаш органларига топширилади.

Элчи Жавлон Ваҳобов Project C.U.R.E. лойиҳаси президенти Дуглас Жексон билан аввал эришилган келишувлари доирасида 3 миллион долларлик тиббий асбоб-ускуналар ва соғлиқни сақлаш буюмларини етказиб бериш бўйича Оролбўйи минтақасида тиббий асбоб-ускуналар учун энг зарур бўлган 24 та тиббиёт муассасаси рўйхатини тузган.

Project C.U.R.E.нинг халқаро ҳукуматлар билан ишлаш бўйича директори Мелиса Эспостининг маълум қилишича, тўртта контейнернинг барчаси АҚШдан Европага денгиз йўли орқали юборилган ва ҳозирда улар йўлда. Америка томонининг маълумотларига кўра, улар Грузияга етказилади ва у ердан ерусти транспортида Нукус шаҳрига олиб келинади.

Элчихона маълумотларига кўра, контейнерлар ичидан УТТ, ИВЛ каби аппаратлар, кислород концентраторлари, рентген сканерлари, янги туғилган чақалоқлар учун интенсив терапия инкубаторлари, дефибрилляторлар, лаборатория ускуналар, кислород балонлар, беморларни ташиш учун аравачалар, операция столлари учун матраслар ва бошқа тиббий товарлар ўрин олган.

Маълумот учун, 1987 йилда ташкил этилган Project C.U.R.E. нодавлат ташкилоти лойиҳаси ривожланаётган мамлакатларга замонавий тиббий асбоб-ускуналар ва асбоблар этишмаслигини бартараф этишда ёрдам беради. Ҳозирда унинг фаолияти дунёнинг 135 давлатини қамраб олган. 2021 йилнинг май ойида Қорақалпоғистон тиббиёт муассасаларига C.U.R.E. лойиҳасининг биринчи икки контейнери, жумладан, шошилинч тиббий ёрдам марказларини жиҳозлаш учун зарур бўлган тиббий буюмлар келиб тушган эди.

Эслатиб ўтамиз, Президент Шавкат Мирзиёев БМТ Бош Ассамблеясининг 75-сессиясидаги нутқида Оролбўйи минтақасини экологик инновация ва технологиялар ҳудуди деб эълон қилиш ҳақида БМТ резолюциясини қабул қилишни таклиф этганди.