Камбағалликни қисқартиришнинг энг яхши йўли – иқтисодий ўсишдир. Бу ҳақда иқтисодчи Беҳзод Ҳошимов UzReport-TV телеканалига берган интервьюсида айтиб ўтди.
Бухоро шаҳрида 26—27 май кунлари Ўзбекистонда камбағалликни қисқартириш масаласида халқаро форум ўтказилмоқда. Тадбирда иштирок этаётган иқтисодчи Беҳзод Ҳошимов камбағаллик муаммосини ечишнинг бир неча чораларини айтди.
“Ўзбекистонда камбағаллик муаммосини ҳал қилиш учун локал ечим қилмоқчи бўлсак, энг яхши йўл – нақд пул бериш. Яъни инсонлар ўзлари пулни нимага, қандай ишлатишни ҳукумат ва ҳокимият аъзоларидан яхши билади. Пул берилса, улар хоҳласа дори олади, хоҳласа нон ёки кийим сотиб олади. Бу энг самарадор йўллардан бири. Камбағалликка қарши глобал ечим эса доимий иқтисодий ўсишдир. Иқтисодий ўсиш бўлмагунча Ўзбекистон ёки бошқа ихтиёрий давлат ва жамиятда камбағаллик масаласи ечилмайди. Камбағалликни қисқартириш сўзи билан иқтисодий ўсиш сўзи бир-бирига тенг тушунчалардир. Ресурсларимиз қанчалик кўп бўлса, заиф қатламга ёрдам беришга имкониятларимиз шунча юқори бўлади”, – деди мутахассис.
Беҳзод Ҳошимовнинг таъкидлашича, мамлакатда камбағалликни марказлашган эмас, маҳаллий даражада ечиш керак.
“Биз марказсизланиш ҳақида ўйлашимиз керак. Яъни асосий фискал ва пул қарорлари жойларда ҳал бўлиши лозим. Чунки ўша ҳудуд аҳолиси қаерга пул сарфлашни марказдан кўра яхшироқ билади. Ҳудудий тараққиётнинг асосий ғояси шундаки, биз имкониятлар ва ресурсларни жойларга беришимиз керак. Аҳолисини камбағалликдан чиқаришда инсоният тарихидаги энг яхши тажриба Хитойда бўлган. Мамлакат ниҳоятда кабағал эди. Лекин ҳозирга келиб, Хитойда 100 миллионлаб инсонлар камбағалликдан чиқиб кетди. Бунга сабаб, Хитойнинг иқтисодий тараққиёти бўлди. Бошқа Осиё давлатлари бор, масалан, Вьетнам. Уларда ҳам иқтисодий ўсиш орқали бу муаммо ҳал бўлди. Ўйлашимча, кейинги навбатда Ҳиндистон турибди. Келаси 30 йилда мамлакатда қарийб 600 миллион киши камбағалликдан чиқиб кетади”, – деди иқтисодчи.
Беҳзод Ҳошимовнинг қўшимча қилишича, яхши иш ўринларининг яратилиши ҳам иқтисодий ўсиш натижасида юзага келади.
“Ўйлайманки, Ўзбекистондаги иқтисодий ривожланиш қанчалик тез бўлса, маҳаллий меҳнат бозорида шунчалик талаб ошади. Тўғри, одамларни иш билан таъминлаш камбағалликни камайтиради. Лекин иши бор инсонларнинг камбағаллари ҳам мавжуд. Яъни эрталабдан кечгача ишлаб косаси оқармайдиган инсонлар ҳам бор. Албатта, бундайлар бошқа давлатларда ҳам бор. Улар “wоркинг поор” (ишлаб турган камбағаллар) дейилади. Айтмоқчиманки, ишнинг ўзи ечим эмас. Ишли бўлса-ю кам пул олса, камбағаллик ечилмайди. Одам яхши даромад оладиган ва ўзини ривожлантирадиган ишлар керак. Бойлик камбағаллик муаммосини ечишнинг энг асосий омилидир”, – деди Беҳзод Ҳошимов.
Аввалроқ Бухорода Ўзбекистон камбағалликни қисқартириш халқаро форуми бошлангани хабар қилинганди. Тадбирда иқтисодий тараққиёт ва камбағалликни қисқартириш вазири Жамшид Қўчқоров нутқ сўзлаб, мамлакатда 2026 йилга қадар камбағалликни 2 бараварга қисқартириш мақсад қилинганини таъкидлаган.
Изоҳ (0)