Бухорода фахрий ёрлиқ берилмаганидан норози битирувчи мактаб директорига сув сепгани тўғрисида хабар берилганди. «Менинг юртим» телеканалининг «Марказий студия» дастурида маълум қилинишича, йигит сувни директорга мақтов ёрлиғи ўзига эмас, балки онасига берилмагани учун сепган.
Маълум бўлишича, сув сепган ўқувчининг онаси мазкур мактабда педагог бўлиб фаолият юритади. Байрам тадбири кунида барча устозлар ўқув йили якунида амалга оширилган намунавий ишлари учун тақдирланган. Аммо улар орасида 11-синф битирувчисининг онаси бўлмаган. Бола шу куни онасининг фахрий ёрлиққа муносиб кўрилмаганидан хафа бўлган.
«Мен кечирим сўрадим. Кўнгилсиз воқеа менга мақтовлар ёзилган бир парча қоғозга муҳтожлигим сабаб келиб чиқмади. Менга дипломлар керак эмас», — дейди йигит. Бироқ ўқувчи мактаб директори билан содир бўлган воқеага нима сабаб бўлганига аниқлик киритмаган.
Ҳозирда ҳолат бўйича ўқувчининг ота-онаси билан фарзандининг хатти-ҳаракатлари юзасидан ИИБ томонидан ўрганиш ишлари олиб борилмоқда.
Аввалроқ Фарғонада ўқувчи қиз ўқитувчи танбеҳидан сўнг синф деразасидан сакрагани бўйича тергов олиб борилаётгани тўғрисида хабар берилганди.
Изоҳ (0)