Янги Наманган, Чилонзор ва Балиқчи туманларида ўқишга киритиш билан боғлиқ ҳолатлар аниқланди, деб хабар беради Бош прокуратура ҳузуридаги департамент.
Хусусан, департаментнинг Янги Наманган тумани бўлими ва ДХХнинг вилоят бошқармаси ходимлари томонидан тезкор тадбир ўтказилган. Тадбир давомида А.У. исмли шахс фуқаро С.ни танишлари орқали Наманган давлат университетининг психология факультетига ўқишга киритиб қўйиш ва ўқишни 3-курсдан бошлаши эвазига 7 500 долларни олган вақтида ашёвий далиллар билан ушланган.
Шунингдек, департаментнинг Чилонзор туман бўлими томонидан ДХХ ходимлари билан ҳамкорликда ўтказилган тезкор тадбирда Самарқанд давлат университети талабаси Р.Т. фуқаро А.ни Қирғизистондаги Замонавий халқаро университетга ўқишга киритиб, кейинчалик ўқишини 2-босқичдан Низомий номидаги Тошкент давлат педагогика университетига кўчириб беришни ваъда қилгани аниқланган. У ўз хизмати эвазига 4 минг долларни олган вақтида ашёвий далиллар билан ушланган.
Андижон вилоятининг Балиқчи туманида ўтказилган тезкор тадбирда эса туман тиббиёт коллежи талабаси Г.Х. фуқаро Г.ни ушбу коллежга танишлари орқали ўқишга киритиб қўйишни ваъда қилиб, эвазига 400 долларни олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Андижон ва Сирдарёда фуқароларнинг хориждаги ўқишини Тошкент тиббиёт академиясига кўчириб бериш учун жами 4,5 минг доллар олган шахслар ушлангани тўғрисида хабар берилганди.
Мавзуга доир:
- Тошкентда 7 млн сўм эвазига фуқарони ўқишини хориждан кўчиртириб беришини ваъда қилган шахс ушланди
- Наманганда фуқарони ДТМдаги танишлари орқали ўқишга киритиб қўйиш учун 7 минг доллар олган шахс ушланди
- Тошкентда фуқаронинг Қирғизистондаги ўқишини 8 минг доллар эвазига Тошкент тиббиёт академиясига кўчириб беришни ваъда қилган шахс ушланди
Изоҳ (0)