Andijonda kollej o‘quvchisi 400 dollar pora bilan qo‘lga tushdi

Yangi Namangan, Chilonzor va Baliqchi tumanlarida o‘qishga kiritish bilan bog‘liq holatlar aniqlandi, deb xabar beradi Bosh prokuratura huzuridagi departament.

Xususan, departamentning Yangi Namangan tumani bo‘limi va DXXning viloyat boshqarmasi xodimlari tomonidan tezkor tadbir o‘tkazilgan. Tadbir davomida A.U. ismli shaxs fuqaro S.ni tanishlari orqali Namangan davlat universitetining psixologiya fakultetiga o‘qishga kiritib qo‘yish va o‘qishni 3-kursdan boshlashi evaziga 7 500 dollarni olgan vaqtida ashyoviy dalillar bilan ushlangan.

Shuningdek, departamentning Chilonzor tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda Samarqand davlat universiteti talabasi R.T. fuqaro A.ni Qirg‘izistondagi Zamonaviy xalqaro universitetga o‘qishga kiritib, keyinchalik o‘qishini 2-bosqichdan Nizomiy nomidagi Toshkent davlat pedagogika universitetiga ko‘chirib berishni va’da qilgani aniqlangan. U o‘z xizmati evaziga 4 ming dollarni olgan vaqtida ashyoviy dalillar bilan ushlangan.

Andijon viloyatining Baliqchi tumanida o‘tkazilgan tezkor tadbirda esa tuman tibbiyot kolleji talabasi G.X. fuqaro G.ni ushbu kollejga tanishlari orqali o‘qishga kiritib qo‘yishni va’da qilib, evaziga 400 dollarni olgan vaqtida ashyoviy dalillar bilan qo‘lga olingan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Andijon va Sirdaryoda fuqarolarning xorijdagi o‘qishini Toshkent tibbiyot akademiyasiga ko‘chirib berish uchun jami 4,5 ming dollar olgan shaxslar ushlangani to‘g‘risida xabar berilgandi.