2022 йилнинг 25 май куни республиканинг барча ҳудудларидаги умумтаълим мактабларида сўнгги қўнғироқ садоси янгради. Эътиборлиси, барча вилоят раҳбарлари Сўнгги қўнғироқ тадбирларида қатнашиб, мактаб битирувчиларини табриклашга вақт топган.
«Дарё» мухбирлари мазкур жараённи тасвирга олди.
Наманган вилояти
1993 йил ўрта мактабни тамомлаган Наманган вилояти ҳокими Шавкат Абдураззоқов бугунги тадбирда синфдошлари билан бирга ўзи таҳсил олган Наманган шаҳридаги 2-умумтаълим мактабига борган.
Вилоят раҳбари мактаб битирувчиларига президент табригини ўқиб эшиттиргач, ўқишда муваффақиятларга эришган ўқувчилар ва уларнинг ота-оналарига ташаккурнома, эсдалик совғаларини топширган.
«1993 йили сизлар каби худди шу ерда, мактабнинг сўнгги қўнғироқ тадбирида катта ҳаяжон билан тургандим. Бирпасда орадан шунча йил ўтиб кетибди. Барчангизга омад ва муваффақият, ўқитувчиларингиз фахр-ифтихор ва соғиниш билан эслайдиган битирувчилар бўлишингизни тилайман», — деди Шавкат Абдураззоқов.
Маълум бўлишича, вилоятдаги умумтаълим мактабларининг 11-синфини қарийб 30 минг нафар ўқувчи битирмоқда.
Андижон вилояти
1986 йил Пахтаобод туманидаги 31-мактабни тамомлаган Андижон вилояти ҳокими Шуҳрат Абдураҳмонов Андижон шаҳридаги 13- ва 30-умумтаълим мактабларига бориб, Сўнгги қўнғироқ тадбирларида қатнашган. Мактаб битирувчиларига президент табригини ўқиб эшиттириб, мактаб даврини эсга олган.
2021—2022-ўқув йилида Андижондаги мавжуд 767 та умумий ўрта таълим мактабининг 11-синфини 30 минг 99 нафар ўқувчи тамомлаган.
Самарқанд вилояти
Вилоятнинг Қўшработ туманидаги 41-мактабни тамомлаган Самарқанд ҳокими Эркинжон Турдимов Самарқанд шаҳрининг Қорасув массивида янги қурилган 81-умумтаълим мактабида ўтказилган Сўнгги қўнғироқ тадбирида иштирок этиб, ўқувчи йигит-қизларни табриклаган.
Қайд этилишича, жорий ўқув йилида Самарқанддаги мактабларни 45 минг 200 нафар ўқувчи тамомлаган бўлиб, улардан 300 нафарга яқини муддатидан олдин хорижий олий таълим муассасаларига ўқишга кирган.
Бухоро вилояти
1987 йил Ғиждувон туманидаги 49-умумий ўрта таълим мактабини битирган Бухоро вилояти ҳокими Ботир Зарипов ҳам ўзи ўқиган мактабга бормаган.
«Дарё» мухбирининг ёзишича, вилоят ҳокими Бухоро шаҳридаги 1-умумтаълим мактабида бўлиб ўтган Сўнгги қўнғироқ тадбирида иштирок этиб, мактабнинг 127 нафар ўқувчиси билан учрашган.
«35 йил илгари мен ҳам Сиз каби сўнгги қўнғироқ жарангига маҳлиё бўлганман. Ўша пайтда ўз орзуларимни забт этиш учун йўлга чиққанман. Ўтган давр мобайнида уларнинг аксарияти ўз рўёбини топди. Албатта, ҳаётда эришилмаганлари ҳам бўлди. Аммо бир ҳақиқат борки, инсон бир мақсад йўлида қатъий ҳаракат қилдими, у албатта, муваффақиятга эришади. Сизларга ҳам омад ёр бўлсин!», — деган вилоят ҳокими ўқувчиларни тадбир билан табриклар экан.
Вилоят халқ таълими бошқармаси бошлиғининг маълум қилишича, жорий ўқув йилида вилоятдаги мавжуд 538 та мактабни 22 412 нафар ўқувчи тамомлаган бўлиб, уларнинг 3 нафари муддатидан олдин хорижий олий таълим муассасалари, шунингдек, хорижий олий таълим муассасаларининг Ўзбекистондаги филиаллари талабасига айланган.
Фарғона вилояти
Фарғона вилояти ҳокими Хайрулла Бозоров Риштон туманидаги 27-ихтисослаштирилган давлат умумтаълим мактаби ҳамда Бувайда туманидаги 2-ихтисослаштирилган давлат умумтаълим мактаб-интернатида ўтказилган Сўнгги қўнғироқ тадбирларида иштирок этган.
Маълум қилинишича, якунига етаётган ўқув йилида вилоятдаги мавжуд 960 та умумтаълим мактабини 42 минг 353 нафар ўқувчи тамомлаб, мустақил ҳаётга йўлланма олган.
Тадбирда муддатидан олдин талаба бўлган, фан олимпиадалари, спорт мусобақаларида ғолиб бўлган ўқувчилар, уларнинг ота-оналари ва устозлари вилоят ҳокимининг эсдалик совғалари билан тақдирланган.
Хорижий тилларни ўқитиш бўйича энг яхши мактаб» танловининг Риштон туман босқичида ғолиб бўлган 27-ИДУМ жамоасига 100 миллион сўм миқдорида президент соврини топширилди. Ментал арифметика бўйича Россия ва Хитойда ўтказилган халқаро танловлар ғолиби, мактабнинг 5-синф ўқувчиси Муҳаммадазиз Содиров, Бухоро шаҳрида ўтказилган қўл жанги бўйича ёшлар ва ўсмирлар ўртасида жаҳон чемпионати совриндори Абдулазиз Абдухалилов диплом ва совғалар билан тақдирланди.
Бувайда туманидаги 2-ИДУМИда бўлиб ўтган тадбирда 56-халқаро Менделеев олимпиадасида бронза медалини қўлга киритган Озодбек Мелиқўзиев ва унинг ота-онаси, ўқитувчилари тақдирланди.
Вилоят ҳокими Озодбек Мелиқўзиевнинг ушбу халқаро олимпиадада муносиб иштирок этишига ўз ҳиссасини қўшган кимё фани ўқитувчиси «Spark» автомашинаси билан тақдирланишини маълум қилди.
Қашқадарё вилояти
1993 йил Китоб туманидаги «Абдулла Қодирий» номидаги 42-сонли мактаб битирувчиси бўлган Қашқадарё вилояти ҳокими Муротжон Азимов Қарши шаҳридаги 15-мактабда бўлиб ўтган Сўнгги қўнғироқ тадбирида қатнашган.
Тадбир давомида битирувчи ўғил-қизларга президент табриги ўқиб эшиттирилган.
Қашқадарёда жорий ўқув йилида битирувчилар сони 42 620 нафар бўлиб, уларнинг 491 нафари муддатидан олдин ОТМ талабаларига айланган.
Сурхондарё вилояти
Сурхондарё вилоятининг Ангор туманидаги мактаблардан бирини тамомлаган вилоят раҳбари Тўра Боболов Термиз шаҳридаги 1-мактабдаги тадбирда иштирок этиб, битирувчиларга президент табригини ўқиб эшиттирган.
Маълум қилинишича, жорий ўқув йилида вилоятдаги 929 та мактабни 32 минг 215 нафар ўқувчи тамомлаган.
Изоҳ (0)