2022-yilning 25-may kuni respublikaning barcha hududlaridagi umumta’lim maktablarida so‘nggi qo‘ng‘iroq sadosi yangradi. E’tiborlisi, barcha viloyat rahbarlari So‘nggi qo‘ng‘iroq tadbirlarida qatnashib, maktab bitiruvchilarini tabriklashga vaqt topgan.
“Daryo” muxbirlari mazkur jarayonni tasvirga oldi.
Namangan viloyati
1993-yil o‘rta maktabni tamomlagan Namangan viloyati hokimi Shavkat Abdurazzoqov bugungi tadbirda sinfdoshlari bilan birga o‘zi tahsil olgan Namangan shahridagi 2-umumta’lim maktabiga borgan.
Viloyat rahbari maktab bitiruvchilariga prezident tabrigini o‘qib eshittirgach, o‘qishda muvaffaqiyatlarga erishgan o‘quvchilar va ularning ota-onalariga tashakkurnoma, esdalik sovg‘alarini topshirgan.
“1993-yili sizlar kabi xuddi shu yerda, maktabning so‘nggi qo‘ng‘iroq tadbirida katta hayajon bilan turgandim. Birpasda oradan shuncha yil o‘tib ketibdi. Barchangizga omad va muvaffaqiyat, o‘qituvchilaringiz faxr-iftixor va sog‘inish bilan eslaydigan bitiruvchilar bo‘lishingizni tilayman”, — dedi Shavkat Abdurazzoqov.
Ma’lum bo‘lishicha, viloyatdagi umumta’lim maktablarining 11-sinfini qariyb 30 ming nafar o‘quvchi bitirmoqda.
Andijon viloyati
1986-yil Paxtaobod tumanidagi 31-maktabni tamomlagan Andijon viloyati hokimi Shuhrat Abdurahmonov Andijon shahridagi 13- va 30-umumta’lim maktablariga borib, So‘nggi qo‘ng‘iroq tadbirlarida qatnashgan. Maktab bitiruvchilariga prezident tabrigini o‘qib eshittirib, maktab davrini esga olgan.
2021—2022-o‘quv yilida Andijondagi mavjud 767 ta umumiy o‘rta ta’lim maktabining 11-sinfini 30 ming 99 nafar o‘quvchi tamomlagan.
Samarqand viloyati
Viloyatning Qo‘shrabot tumanidagi 41-maktabni tamomlagan Samarqand hokimi Erkinjon Turdimov Samarqand shahrining Qorasuv massivida yangi qurilgan 81-umumta’lim maktabida o‘tkazilgan So‘nggi qo‘ng‘iroq tadbirida ishtirok etib, o‘quvchi yigit-qizlarni tabriklagan.
Qayd etilishicha, joriy o‘quv yilida Samarqanddagi maktablarni 45 ming 200 nafar o‘quvchi tamomlagan bo‘lib, ulardan 300 nafarga yaqini muddatidan oldin xorijiy oliy ta’lim muassasalariga o‘qishga kirgan.
Buxoro viloyati
1987-yil G‘ijduvon tumanidagi 49-umumiy o‘rta ta’lim maktabini bitirgan Buxoro viloyati hokimi Botir Zaripov ham o‘zi o‘qigan maktabga bormagan.
“Daryo” muxbirining yozishicha, viloyat hokimi Buxoro shahridagi 1-umumta’lim maktabida bo‘lib o‘tgan So‘nggi qo‘ng‘iroq tadbirida ishtirok etib, maktabning 127 nafar o‘quvchisi bilan uchrashgan.
“35 yil ilgari men ham Siz kabi so‘nggi qo‘ng‘iroq jarangiga mahliyo bo‘lganman. O‘sha paytda o‘z orzularimni zabt etish uchun yo‘lga chiqqanman. O‘tgan davr mobaynida ularning aksariyati o‘z ro‘yobini topdi. Albatta, hayotda erishilmaganlari ham bo‘ldi. Ammo bir haqiqat borki, inson bir maqsad yo‘lida qat’iy harakat qildimi, u albatta, muvaffaqiyatga erishadi. Sizlarga ham omad yor bo‘lsin!”, — degan viloyat hokimi o‘quvchilarni tadbir bilan tabriklar ekan.
Viloyat xalq ta’limi boshqarmasi boshlig‘ining ma’lum qilishicha, joriy o‘quv yilida viloyatdagi mavjud 538 ta maktabni 22 412 nafar o‘quvchi tamomlagan bo‘lib, ularning 3 nafari muddatidan oldin xorijiy oliy ta’lim muassasalari, shuningdek, xorijiy oliy ta’lim muassasalarining O‘zbekistondagi filiallari talabasiga aylangan.
Farg‘ona viloyati
Farg‘ona viloyati hokimi Xayrulla Bozorov Rishton tumanidagi 27-ixtisoslashtirilgan davlat umumta’lim maktabi hamda Buvayda tumanidagi 2-ixtisoslashtirilgan davlat umumta’lim maktab-internatida o‘tkazilgan So‘nggi qo‘ng‘iroq tadbirlarida ishtirok etgan.
Ma’lum qilinishicha, yakuniga yetayotgan o‘quv yilida viloyatdagi mavjud 960 ta umumta’lim maktabini 42 ming 353 nafar o‘quvchi tamomlab, mustaqil hayotga yo‘llanma olgan.
Tadbirda muddatidan oldin talaba bo‘lgan, fan olimpiadalari, sport musobaqalarida g‘olib bo‘lgan o‘quvchilar, ularning ota-onalari va ustozlari viloyat hokimining esdalik sovg‘alari bilan taqdirlangan.
Xorijiy tillarni o‘qitish bo‘yicha eng yaxshi maktab” tanlovining Rishton tuman bosqichida g‘olib bo‘lgan 27-IDUM jamoasiga 100 million so‘m miqdorida prezident sovrini topshirildi. Mental arifmetika bo‘yicha Rossiya va Xitoyda o‘tkazilgan xalqaro tanlovlar g‘olibi, maktabning 5-sinf o‘quvchisi Muhammadaziz Sodirov, Buxoro shahrida o‘tkazilgan qo‘l jangi bo‘yicha yoshlar va o‘smirlar o‘rtasida jahon chempionati sovrindori Abdulaziz Abduxalilov diplom va sovg‘alar bilan taqdirlandi.
Buvayda tumanidagi 2-IDUMIda bo‘lib o‘tgan tadbirda 56-xalqaro Mendeleyev olimpiadasida bronza medalini qo‘lga kiritgan Ozodbek Meliqo‘ziyev va uning ota-onasi, o‘qituvchilari taqdirlandi.
Viloyat hokimi Ozodbek Meliqo‘ziyevning ushbu xalqaro olimpiadada munosib ishtirok etishiga o‘z hissasini qo‘shgan kimyo fani o‘qituvchisi “Spark” avtomashinasi bilan taqdirlanishini ma’lum qildi.
Qashqadaryo viloyati
1993-yil Kitob tumanidagi “Abdulla Qodiriy” nomidagi 42-sonli maktab bitiruvchisi bo‘lgan Qashqadaryo viloyati hokimi Murotjon Azimov Qarshi shahridagi 15-maktabda bo‘lib o‘tgan So‘nggi qo‘ng‘iroq tadbirida qatnashgan.
Tadbir davomida bitiruvchi o‘g‘il-qizlarga prezident tabrigi o‘qib eshittirilgan.
Qashqadaryoda joriy o‘quv yilida bitiruvchilar soni 42 620 nafar bo‘lib, ularning 491 nafari muddatidan oldin OTM talabalariga aylangan.
Surxondaryo viloyati
Surxondaryo viloyatining Angor tumanidagi maktablardan birini tamomlagan viloyat rahbari To‘ra Bobolov Termiz shahridagi 1-maktabdagi tadbirda ishtirok etib, bitiruvchilarga prezident tabrigini o‘qib eshittirgan.
Ma’lum qilinishicha, joriy o‘quv yilida viloyatdagi 929 ta maktabni 32 ming 215 nafar o‘quvchi tamomlagan.
Izoh (0)