«ЖСТ аъзоси бўлмаслигимиз миллий ва иқтисодий манфаатларимизни ҳимоя қилиш воситаларидан фойдаланмаётганимизни билдиради» — Содиқ Сафоев ЖСТ ва ЕОИИ ҳақида

Ўзбекистон Жаҳон савдо ташкилотига (ЖСТ) аъзо бўлиш ҳаракатида, Евросиё иқтисодий иттифоқига (ЕОИИ ) кириш масаласида эса ўрганиш ўтказмоқда. Бу ҳақда Сенат раисининг биринчи ўринбосари Содиқ Сафоев журналистларга берган интервьюсида айтиб ўтди, дея хабар бермоқда «Дарё» мухбири.

Содиқ Сафоевнинг таъкидлашича, ЖСТга кириш мамлакат миллий ва иқтисодий манфаатлари ҳимояси учун муҳим восита ҳисобланади.

«Биз Ўзбекистон учун ЖСТ қанчалик муҳимлигини тушунамиз. Кеча Жаҳон иқтисодиёти ва дипломатия университетида ЖСТ кафедрасини очдик. Унинг асосий мақсади — илмий тадқиқотлар олиб бориш, яъни қандай қилиб ЖСТга кириш жараёнларини енгиллаштиришимиз мумкинлигини ўрганиш. Ишонаманки, Ўзбекистон ЖСТга кириш жараёнини жадаллаштириши керак. Бу ҳақда давлат раҳбарининг тегишли кўрсатмалари ҳам бор. Бу ташкилот ичида Ўзбекистон манфаатларини ҳимоя қилиш учун механизмлар мавжуд. У бизга имкониятларни очади. Албатта, имконият очиши билан бирга, алоҳида бир сектор ёки тармоқларимизга қандайдир муаммоларни ҳам туғдириши мумкин. Лекин умуман олганда, шу ташкилотга кирмаган саноқли давлатлар қолди. Ва бизнинг у ерда бўлмаслигимиз, ўзимизнинг иқтисодий, миллий манфаатларимизни ҳимоя қилиш учун воситалардан фойдаланмаётганимизни билдиради. ЖСТга кириш бизнинг олдимизда турган муҳим масалалардан бири», — деди Сенат расмийси.

Шунингдек, Содиқ Сафоев Ўзбекистон ЕОИИга аъзо бўлиш борасида ўрганиш ўтказаётганини айтди.

«Евросиё иқтисодий иттифоқига қўшилиш масаласида ўрганиш жараёни давом этмоқда. Ҳаммамиз англаймиз, бу ерда мураккаб жараёнлар амалга ошмоқда. Биз ўрганиб боряпмиз. Бунинг учун масаланинг ичига кириб, билим эвазига натижага эришишимиз мумкин», — деди юқори палата вакили.

Аввалроқ Содиқ Сафоев йирик ислоҳотларни амалга ошириш учун Конституцияни ўзгартириш кераклигини таъкидлаганди.

«Масалан, ҳамма айтадиган масала — инвестициялар, иқтисодиётимизнинг ривожланиши ер ислоҳоти билан боғлиқ. Аммо амалдаги Конституция бунга тўсиқ бўлиб турибди. Хусусий мулк, инсон ҳуқуқларини кафолатлаш каби масалаларнинг барчаси конституцион ўзгаришларни талаб қилади», — деган эди Сенат раиси ўринбосари.