Фарғона вилоятининг Учкўприк ҳамда Тошкент вилоятининг Юқори Чирчиқ туманларида табиий газ тармоғига ноқонуний уланиш ҳолатлари аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Учкўприк туман бўлими томонидан терговга қадар текширув ўтказилган. Текширув давомида фуқаро С.У. Ўзбекистон тумани «Мингтут» МФЙ ҳудудида оҳак ишлаб чиқаришга ихтисослаштирилган яширин цех ташкил қилиб, табиий газ тармоғига ўзбошимчалик билан улангани аниқланган. Цех фаолияти натижасида давлат ва жамият манфаатларига 650,8 миллион сўм зарар етказган.
Шунингдек, Юқори Чирчиқ туман бўлими томонидан ўтказилган терговга қадар текширувда, фуқаро К.Т. ўзига тегишли бўлган нотурар бинода ташкил қилинган иссиқхонани табиий газ тармоғига ўзбошимчалик билан улаб, табиий газдан ноқонуний фойдалангани оқибатида давлат ва жамият манфаатларига 74,7 миллион сўм зарар етказилганлиги аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Марғилонда қўлбола газ ёндиргичлар орқали оҳак ишлаб чиқариш билан шуғулланган яширин цех аниқланган эди.
Изоҳ (0)