Самарқандда ИИБ ходимлари қозоғистонлик туристларга электрошокер қўллагани тўғрисида хабар берилганди. Қозоғистон Ташқи ишлар вазирлиги расмий вакили Айбек Смадияров мазкур ҳолатга изоҳ берди, деб ёзади «Kazinform».
«Қозоғистон Ташқи ишлар вазирлиги вазиятга ойдинлик киритиш мақсадида хат билан мурожаат қилди. Биз барча фуқароларимиз ҳуқуқларини ҳимоя қиламиз», — дейди Айбек Смадияров.
Унинг сўзларига кўра, идора вазиятни ўрганиб чиққан.
«Таъкидлаш керакки, ижтимоий тармоқларда тарқалган Ўзбекистон ҳуқуқ-тартибот органлари фуқароларимизга нисбатан электрошокерларни қўллагани тасвирланган видео изоҳларининг ўзида Ўзбекистон жамияти ҳуқуқ-тартибот органлари ҳаракатларини қораламоқда. Шу билан бирга, биз вазиятни назорат қиляпмиз», — дейди ТИВ вакили.
«У ерда ички текширув бошланган, ходимлар хизматдан четлатилган. Биз бунга аралашмасликка уриняпмиз ва фақат фуқароларимиз ҳуқуқларини ҳимоя қилиш қисмини кузатяпмиз», — дейди Смадияров.
Аввалроқ Ўзбекистон ИИВ матбуот котиби Шоҳрух Ғиёсов ҳозирда мазкур ҳолат юзасидан ИИВ Шахсий хавфсизлик хизмати томонидан прокуратура органлари билан ҳамкорликда хизмат текшируви ўтказилаётганини маълум қилганди. «Текширув якунига кўра, қонунчиликка зид ҳаракат қилган барча ходимларнинг ҳамда фаолиятга масъул раҳбарларнинг хизматдан бўшатилиши ва жавобгарлик масаласи кўриб чиқилади», — деганди у.
Изоҳ (0)