Samarqandda IIB xodimlari qozog‘istonlik turistlarga elektroshoker qo‘llagani to‘g‘risida xabar berilgandi. Qozog‘iston Tashqi ishlar vazirligi rasmiy vakili Aybek Smadiyarov mazkur holatga izoh berdi, deb yozadi “Kazinform”.
“Qozog‘iston Tashqi ishlar vazirligi vaziyatga oydinlik kiritish maqsadida xat bilan murojaat qildi. Biz barcha fuqarolarimiz huquqlarini himoya qilamiz”, — deydi Aybek Smadiyarov.
Uning so‘zlariga ko‘ra, idora vaziyatni o‘rganib chiqqan.
“Ta’kidlash kerakki, ijtimoiy tarmoqlarda tarqalgan O‘zbekiston huquq-tartibot organlari fuqarolarimizga nisbatan elektroshokerlarni qo‘llagani tasvirlangan video izohlarining o‘zida O‘zbekiston jamiyati huquq-tartibot organlari harakatlarini qoralamoqda. Shu bilan birga, biz vaziyatni nazorat qilyapmiz”, — deydi TIV vakili.
“U yerda ichki tekshiruv boshlangan, xodimlar xizmatdan chetlatilgan. Biz bunga aralashmaslikka urinyapmiz va faqat fuqarolarimiz huquqlarini himoya qilish qismini kuzatyapmiz”, — deydi Smadiyarov.
Avvalroq O‘zbekiston IIV matbuot kotibi Shohrux G‘iyosov hozirda mazkur holat yuzasidan IIV Shaxsiy xavfsizlik xizmati tomonidan prokuratura organlari bilan hamkorlikda xizmat tekshiruvi o‘tkazilayotganini ma’lum qilgandi. “Tekshiruv yakuniga ko‘ra, qonunchilikka zid harakat qilgan barcha xodimlarning hamda faoliyatga mas’ul rahbarlarning xizmatdan bo‘shatilishi va javobgarlik masalasi ko‘rib chiqiladi”, — degandi u.
Izoh (0)