Ошхонада ўтказиладиган тажрибалар одатда қизиқарли ва мазали бўлиши мумкин, аммо тўғри овқатланиш бўйича мутахассислар истеъмол жараёнида айрим маҳсулот ва ичимликларни бирлаштиришдан эҳтиёт бўлишни маслаҳат беради. Овқат ҳазм қилиш тизимига зарар етказмоқчи ёки кун бўйи ўзингизни ёмон ҳис қилмоқчи бўлмасангиз Marie Claire нашри тақдим этган бир нечта комбинациялардан имкон қадар сақланиш керак.
Икки юқори оқсилли маҳсулот
Мисол учун, тухум ва гўшт ёки товуқ ва пишлоқ. Оқсилли маҳсулотлар жуда узоқ вақт давомида ҳазм қилинади ва агар бир идишда ёки таомда иккисидан ҳам бўлса, ҳазм жараёни ундан ҳам узоққа чўзилади. Шунингдек, кун охиригача ошқозонда оғирлик ҳисси кафолатланади. Биргина оқсилга бой маҳсулотни углевод ёки клечаткалиси билан истеъмол қилиш яхшироқ.
Цитрус ва сут
Бу комбинацияни доимий равишда сутли коктейл ва музқаймоқлардан топиш мумкин. Албатта, бу жуда мазали, аммо цитрус мевалари сутнинг ошқозонда қотиб қолишига олиб келади, бу қорин дам бўлиши ёки жиғилдон қайнашига сабаб бўлади.
Сут ва банан
Севиб истеъмол қилинадиган коктейл ва ширинликлар учун яна бир машҳур комбинация. Аммо ушбу жуфтликни ҳам ҳазм қилиш жуда қийин. Агар бананли коктейлларни жуда яхши кўрадиганлар бўлса, ҳазм қилиш осон бўлиши учун уларга бир чимдим долчин ёки мускат ёнғоғини қўшиш тавсия этилади.
Ҳар қандай таом билан мева
Агар мевалар овқатдан кейин дарҳол ёки аралаш истеъмол қилинса — асосий таом билан бир қаторда, улар ошқозонда ферментацияни бошлайди. Бу эса ошқозонда оғирлик, жиғилдон қайнаши ва кекиришни келтириб чиқаради. Ушбу муаммоларнинг олдини олиш учун меваларни овқатдан бироз вақт ўтиб, алоҳида истеъмол қилиш мумкин.
Салқин ичимликлар билан пишлоқ
Афсуски, муздек кола ва пишлоқли пиццани биргаликда тановул қилишни ёқтирадиганлар учун ёмон янгилик бор: бу комбинация соғлиқ учун фақат зарарли. Гап шундаки, салқин ичимликлар пишлоқ ва у таркибда бўлган барча егуликларни ҳазм қилишни қийинлаштиради. Натижада, бу ошқозонда ноқулайлик ва оғриқ пайдо бўлишига олиб келиши мумкин.
Изоҳ (0)