Бухорода ўтказилаётган «Халқаро зардўзлик, заргарлик ва каштачилик санъати» фестивалининг иккинчи куни «Анъанавий зардўзлик ва заргарлик, каштадўзлик санъатини ривожлантириш истиқболлари» мавзусидаги илмий-амалий конференция билан бошланди, дея хабар бермоқда «Дарё» мухбири.
Ушбу анжуманда 30 нафар хорижий, 60 нафар маҳаллий маърузачи қатнашди. Жумладан, Озарбайжон, Туркия, Қозоғистон, Қирғизистон, Тожикистон ва Туркманистондан келган ҳунармандлар маъруза қилди. Унда заргарлик, зардўзлик ва каштадўзлик санъати тарихи, уларнинг иқтисодиёт ривожига қўшган ҳиссаси хусусида сўз борди.
Анжуманда қатнашган Бутунжаҳон ҳунармандлар кенгаши раиси Саад ал-Қаддумий ўз нутқида Ўзбекистоннинг турли вилоятларидан келган ҳунармандларнинг маҳсулотларини кузатиб, уларнинг қўл меҳнатларига, маҳоратларига баҳо берди.
«Ўзбекистоннинг бошқа ҳудудлари ҳам Жаҳон ҳунармандлар шаҳри мақомини олади», — деди у ўз нутқида.
Фестивальнинг кейинги тадбирлари ҳам эски шаҳарнинг турли қисмларида юқори савияда ташкиллаштирилди. Кўнгилочар дастурлар, миллий куй-қўшиқлар ва фольклор дасталар, қизиқчилар чиқишлари 10 мингдан ортиқ аҳолини атрофига қамраб олди. Шунингдек, савдо-сотиқ учун мўлжалланган расталарга маҳаллий ва хорижлик уста-заргарлар томонидан турли тилла ва кумуш тақинчоқларини савдога қўйилди.
Билдирилишича, фестивалда иштирок этиш учун хорижий мамлакатлар заргарлари томонидан 22 килограмм кумуш ва 10 килограмм олтин буюм маҳсулотлари олиб келинган.
Фестиваль дастурлари давом этмоқда.
Изоҳ (0)