Тошкент вилояти Бекобод шаҳрида 22 май куни одам ўлими билан боғлиқ йўл-транспорт ҳодисаси содир бўлди. Бу ҳақда Йўл ҳаракати хавфсизлиги хизмати хабар қилди.
Қайд этилишича, ҳолат шу куни соат 12:40 ларда Бекобод шаҳри «Маданият» маҳалласи ҳудудидан ўтган 4П-26 Сирдарё—Деҳқонобод—Бекобод автомобиль йўлининг 99-километрида юз берган. Ҳайдовчи Ж.Г. (1985 йилда туғилган) «ВАЗ-2104» автомобилида ўзидан олдинда бўлган транспортни қувиб ўтиш мақсадида қарама-қарши ҳаракатланиш учун мўлжалланган томонга чиққан. Шу вақтда рўпарасидан келаётган ҳайдовчи О.И. (1986 йилда туғилган) бошқарувида бўлган Cobalt автомобили билан тўқнашган.
ЙТҲ оқибатида «ВАЗ-2104» автомобили ҳайдовчиси Ж.Г. ва Cobalt автомобилида бўлган йўловчи С.А. (2022 йилда туғилган) оғир тан жароҳатлари олиб воқеа жойида вафот этган. Шунингдек, Cobalt ҳайдовчиси О.И. ва ушбу автомобиль йўловчиси Н.И. (1961 йилда туғилган) ҳамда «ВАЗ-2104» йўловчиси А.С. (2013 йилда туғилган) тан жароҳати олиб шифохонага ётқизилган.
Ҳолат юзасидан Бекобод шаҳар ИИБ ҳузуридаги тергов бўлими томонидан дастлабки тергов ҳаракатлари олиб борилмоқда.
Изоҳ (0)