Қашқадарё вилояти Деҳқонобод туманида 13 май куни уйидан чиқиб кетиб, бедарак йўқолган фуқаронинг жасади топилди. Бу ҳақда вилоят Фавқулодда вазиятлар бошқармаси хабар қилди.
Қайд этилишича, шу куни Қашқадарё вилояти ФВБга Сурхондарё вилояти Ангор туманида яшовчи фуқаро З.I. (1995 йилда туғилган) Қашқадарё вилояти Қамаши ва Деҳқонобод туманларининг тоғли ҳудудларида йўқолиб қолгани тўғрисида хабар келиб тушган. Аниқланишича, фуқаро З.I. 2 май куни чорва молларини боқиш мақсадида тоғли ҳудудларга жўнаб кетган ва дом-даракциз йўқолган. Шу боис уни яқинлари анча қидирган, бироқ топа олишмаган.
Мурожаатга кўра, вилоят ФВБ Махсус вазифаларни бажарувчи минтақавий отрядининг 1 та бўлинмаси юқоридаги манзилларда қидирув-қутқарув ишларини олиб борган. Қидирув ишларида фуқаро З.I.нинг жасади Деҳқонободнинг Ойбек қишлоғи Дарвозаком тепалигидаги тахминан 10 метр чуқурликдаги жарликдан топилган ва яқин қариндошларига топширилган.
Ушбу қидирув-қутқарув ишларида Ўрмон хўжалиги ходимлари ва маҳаллий аҳоли бевосита иштирок этган.
Аввалроқ Сирдарё вилоятида каналга чўкиб кетган 17 ёшли йигитнинг жасади қидирилаётгани, Фарғоналик аёл икки нафар фарзанди билан Катта Фарғона каналига чўкиб кетгани, Навоийда олтинни ноқонуний ковлаб олишга уринган 5 кишини тупроқ босиб қолгани ҳақида хабар берилган.
Изоҳ (0)