Давлат активларини бошқариш агентлиги (ДАБА) ҳузуридаги UzAssets инвестиция компанияси «Фарғона нефтни қайта ишлаш заводи» устав фондидаги UzAssets’нинг 100 фоиз улушини 100 млн долларга сотиш тўғрисида келишувга эришди.
Заводни нефть ва газ соҳасидаги хусусий корхона — «Саноат энергетика гуруҳи» сотиб олади.
Хусусийлаштириш очиқ савдо жараёни орқали амалга оширилгани айтилмоқда. Бу бўйича консултант сифатида KPMG Valuation аnd Consulting халқаро консалтинг компанияси жалб қилинган.
Давлат улушини баҳолаш учун эса Big4 («Катта тўртлик»)га кирган халқаро баҳолаш компанияси жалб қилинган. Dentons халқаро юридик фирмаси томонидан UzAssets’га қўшимча ҳуқуқий кўмак кўрсатилган.
Сотиш жараёни бошлангани ҳақидаги хабар 2021 йил 30 апрель куни эълон қилинган эди.
Корхона мамлакатдаги дастлабки ишлаб чиқариш қуввати 6,5 млн тоннани ташкил этадиган энг йирик нефтни қайта ишлаш заводларидан бири бўлиб, унинг тарихи 1959 йилга бориб тақалади. 1907 йилда ишга туширилган Олтиариқ ёқилғи ишлаб чиқариш қуввати шулар жумласидандир.
Ўтган асрнинг 60 йилларида «Фарғона нефтни қайта ишлаш заводи» Ғарбий Сибир конларидан хом ашё билан таъминланган.
Бундан ташқари, завод бутун собиқ Совет хом ашёсини қайта ишлаш тизимининг бир қисми бўлган. Ўтган 20 йил давомида заводда модернизация ва реконструкция ишлари амалга оширилмаган.
Заводнинг тўлиқ ишлаши учун асосий қийинчиликлардан бири бу Ўзбекистон ҳудудида хом ашёнинг етишмаслигидир. Пандемия корхонанинг молиявий фаолиятига ҳам салбий таъсир кўрсатиб, нефть таъминотининг етишмаслигини оширди ҳамда нефть маҳсулотларига талабни камайтирди.
Сўнгги 10 йил ичида йилига ўртача 1-1,5 млн тонна нефть қайта ишланган бўлса, 2020 йилда атиги 900 минг тонна хом ашё қайта ишланган, холос.
Битим доирасида «Саноат энергетика гуруҳи» қуйидаги мажбуриятларни бажаришни ўз зиммасига олади:
- Замонавий ва экологик тоза бензин;
- Евро-5 талабларига жавоб берадиган дизель ёнилғиси;
- Жет а-1 реактив ёнилғиси;
- Суюлтирилган табиий газ ишлаб чиқаришни кўпайтириш;
- Нефть агрегатларини модернизация қилиш;
- Ишлаб чиқариш қувватини камида 2 миллион тоннага ошириш;
- 380 млн доллардан ортиқ инвестиция мажбуриятларини бажариш.
- 2 йил мобайнида корхонада мавжуд иш ўринларини ва ишчилар сонини сақлаб қолиш;
- Ходимларнинг иш ҳақларини битим имзолаш санасидаги миқдордан камайтирмаслик;
- Жамоа шартномасининг асосий шартлари сақланишини таъминлаш;
- Бошқа ижтимоий мажбуриятларни максимал даражада сақлаш.
«Саноат энергетика гуруҳи» Ўзбекистондаги энг йирик хусусий вертикал интеграциялашган нефть ва газ компанияларидан бири ҳисобланади.
Айни пайтда компания ер қаъридан фойдаланиш ҳуқуқига эга бўлган 103 та конга эгалик қилади ва нефть қазиб олишнинг тахминан 80 фоизини ва тасдиқланган газ захираларининг тахминан 22 фоизини ташкил қилади.
Нефть ва газ қазиб олишдан ташқари, компания бензин, дизель, нефть, авиация керосини ва бошқа бир қатор юқори қўшилган қийматга эга маҳсулотлар ишлаб чиқаради.
Корхона Ўзбекистондаги стратегик лойиҳаларда, жумладан, нефть қазиб олишни кўпайтириш лойиҳаларида иштирок этади.
Аввалроқ Халқаро молия корпорацияси «Фарғонаазот»ни хусусийлаштиришга ёрдам бериши ҳақида хабар берилган эди.
Изоҳ (0)