Qashqadaryo viloyati Dehqonobod tumanida 13-may kuni uyidan chiqib ketib, bedarak yo‘qolgan fuqaroning jasadi topildi. Bu haqda viloyat Favqulodda vaziyatlar boshqarmasi xabar qildi.
Qayd etilishicha, shu kuni Qashqadaryo viloyati FVBga Surxondaryo viloyati Angor tumanida yashovchi fuqaro Z.I. (1995-yilda tug‘ilgan) Qashqadaryo viloyati Qamashi va Dehqonobod tumanlarining tog‘li hududlarida yo‘qolib qolgani to‘g‘risida xabar kelib tushgan. Aniqlanishicha, fuqaro Z.I. 2-may kuni chorva mollarini boqish maqsadida tog‘li hududlarga jo‘nab ketgan va dom-daraksiz yo‘qolgan. Shu bois uni yaqinlari ancha qidirgan, biroq topa olishmagan.
Murojaatga ko‘ra, viloyat FVB Maxsus vazifalarni bajaruvchi mintaqaviy otryadining 1 ta bo‘linmasi yuqoridagi manzillarda qidiruv-qutqaruv ishlarini olib borgan. Qidiruv ishlarida fuqaro Z.I.ning jasadi Dehqonobodning Oybek qishlog‘i Darvozakom tepaligidagi taxminan 10 metr chuqurlikdagi jarlikdan topilgan va yaqin qarindoshlariga topshirilgan.
Ushbu qidiruv-qutqaruv ishlarida O‘rmon xo‘jaligi xodimlari va mahalliy aholi bevosita ishtirok etgan.
Avvalroq Sirdaryo viloyatida kanalga cho‘kib ketgan 17 yoshli yigitning jasadi qidirilayotgani, Farg‘onalik ayol ikki nafar farzandi bilan Katta Farg‘ona kanaliga cho‘kib ketgani, Navoiyda oltinni noqonuniy kovlab olishga uringan 5 kishini tuproq bosib qolgani haqida xabar berilgan.
Izoh (0)