Бандлик ва меҳнат муносабатлари вазири Нозим Ҳусанов Ўзбекистонда 2021 йил 20 нафар мансабдор мажбурий меҳнатга йўл қўйгани учун улардан 1,9 миллиард сўм жарима ундирилганини маълум қилди. Вазир бу ҳақда «Дарё» билан суҳбатда айтиб ўтган.
«2021 йилда 20 та ҳолатда шунча мансабдор томонидан мажбурий меҳнатга йўл қўйиш ҳолати аниқланиб, улардан 1,9 миллиард сўм миқдордаги жарима ундирилган. Бу нафақат соғлиқни сақлаш ва халқ таълими, бошқа соҳа вакилларида ҳам кузатилган», — дейди вазир Нозим Ҳусанов.
Бандлик ва меҳнат муносабатлари вазири Нозим Ҳусанов Ўзбекистонда мажбурий меҳнатга барҳам бериш учун кўп меҳнат қилинганини таъкидламоқда.
«Бугунги кунга келиб халқаро меҳнат ташкилоти расмий ҳисоботида Ўзбекистонда мажбурий меҳнат йўқлиги эътироф этилмоқда. Бу қувонарли. Бунга эришиш, мажбурий меҳнатга барҳам бериш жуда қийин кечди. Бироқ, минг афсуслар бўлсинки, айни кунда ҳам мажбурий меҳнатга йўл қўяётган масъуллар борлигини кўряпмиз. Уларга қарши муросасиз курашда давом этяпмиз», — дейди вазир.
Вазирга кўра, аввалроқ Ўзбекистонда мажбурий меҳнат борлиги токи президент Шавкат Мирзиёев БМТ минбарида тан олмагунга қадар инкор этиб келинган.
«Тан олиш керак, муҳтарам президентимиз БМТ минбарида туриб, Ўзбекистонда мажбурий меҳнат борлигини тан олиб, унга қарши курашилишини айтмагунга қадар, биз ўзимизда бўлаётган мажбурий меҳнатни тан олмаганмиз. Бу тан олингачгина, унга қарши муросасиз курашни бошладик. Ҳатто ўзимиз ҳам талабалик пайтимизда 1992—1993 йилларда пахта терганмиз. Бу муаммо бор эди. Ва президентимиз ташаббуси билан бунга чек қўйилди», — дейди вазир.
Вазир суҳбат якунида ОАВ вакиллари ва блогерларга мурожаат қилиб, мажбурий меҳнатга йўл қўйилган ҳолат бўлса, бу ҳақда вазирликка хабар беришлари лозимлигини илтимос қилиб, мажбурий меҳнатга биргаликда барҳам беришга чақирди.
Изоҳ (0)