Бухоро туманидаги 26-умумий ўрта мактабининг 8-синфида ўқиётган қиз мактаб директори томонидан аёвсиз калтаклангани ҳақида хабар берилганди. «Дарё» мухбири мазкур ҳолатга аниқлик киритиш мақсадида ўрганиш олиб борди.
«2022 йилнинг 19 май куни тумандаги 26-умумий ўрта таълим мактаби директори ўқувчисини калтаклагани ҳақидаги хабарни эшитганим заҳоти таълим тизими ҳамда ҳуқуқ-тартибот идоралари вакилларидан иборат ишчи гуруҳ тузиб, ҳолатни ўргандик», — дейди Бухоро тумани халқ таълими бўлими мудири Шамшод Саъдуллаев.
Масъулнинг маълумот беришича, 2022 йилнинг 17 май куни тумандаги 26-умумий ўрта таълим мактаби директори Умида Жўраева 8-синф ўқувчиси Н.Ҳ.нинг чап қўл елка ва тирсак юқори билакларига таёқ билан уриб, унга ўрта оғир даражада жароҳат етказган.
«Дарё» мухбирининг аниқлаштиришича, 2022 йилнинг 8 март куни калтакланган Н.Ҳ.дан шу синфда таҳсил олаётган амакисининг ўғли С.Ҳ. 6-синфда ўқиётган 14 ёшли Б.И. исмли қизга олган гулдастани совға тариқасида етказиб қўйишини илтимос қилган. Ўқувчи қиз гулни Б.И.га олиб борган. Б.И. эса гулларни олмай қайтариб берган. Бундан илгари ҳам бир неча маротаба шундай воқеа такрорлангани боис Б.И. Н.Ҳ.га қариндошининг номидан гул ҳам, хат ҳам келтирмаслигини тайинлаган. Шундан сўнг С.Ҳ. яна ўқувчи қиз орқали унинг совға-саломини қайтарган Б.И. билан бир синфда ўқийдиган З.С.исмли қизга аталган гулларини етказиб қўйишини сўраган. Н.Ҳ. яна амакисининг ўғли талаби билан гулларни айтилган қизга олиб борган. З.С. гулларни олмаган ва Н.Ҳ.га бундай ишлар қилмаслигини айтиб, уришиб берган.
Мактаб директори Умида Жўраеванинг «Дарё»га билдиришича, Н.Ҳ. қариндоши берган совға-саломларини қабул қилмаётган қизларга «Совғаларни олмасанг, учрашувга чиқмасанг, кўча-кўйда шарманда қиламан», деб пўписа қилиб келган.
«17 май куни Н.Ҳ.нинг синф раҳбари Шоира Солиева қиз шундай хатти-ҳаракатларини давом эттираётганини, ўқувчи қизнинг тарбиясига кучи етмаётганини айтди. Мактаб ўқувчилари орасида шундай ‘шантаж’ликлар давом этиб келаётгани ҳақида эшитиб, бундан жаҳлим чиқди. Қаттиқ жазавага тушдим ва асабимни тўхтатолмай, ўқувчи қизни калтакладим. Яширмайман, хато қилдим. Жаҳлим чиққанда шошиб қолдим, шекилли», — дейди мактаб директори.
Директорнинг билдиришича, ўқувчи қизнинг гул ва совға ташишидан безор бўлган 6-синф ўқувчи қизлари ҳам мактаб директорига шикоят қилган.
«Шу ўринда, айтишим керакки, Н.Ҳ.нинг мактабдаги хатти-ҳаракатларидан норози бўлиб, 6-синфда ўқийдиган Б.И. ва З.С.лар ҳам шикоят хати ёзиб берган. Ваҳоланки, у 6-синф ўқувчи қизларини ўқувчилар орасида ‘келиним’, деб изза қилиб келган», — дейди мактаб директори.
Директорнинг билдиришича, у ўз хатосини тушуниб етиб, ўқувчи қизнинг ота-онасидан узр сўрагани уларнинг хонадонига борган. Бироқ ота-онаси унинг узр ва кечиримларини қабул қилишни истамаган.
«Ўқувчи қизнинг хонадонига кечирим сўраш учун бордим. Кечки овқат пайти эди. Дастурхон устида спиртли ичимлик қўйилган ва қизнинг ота-онаси спиртли ичимлик истеъмол қилган эди. Тўғриси, бу оила нотинч оила сирасига киради. Бундан бир неча йил илгари ҳам Н.Ҳ.нинг катта опалари турмушга чиқиб кетгунга қадар мактабимиз жамоаси анча-мунча муаммоларга дуч келганмиз», — дейди мактаб раҳбари.
«Дарё» мухбири калтакланган ўқувчи қиз ва унинг ота-онаси билан суҳбатлашиш мақсадида улар яшовчи маҳалла «Амиробод-Гулистон» МФЙ раиси Алишер Файзиев билан телефон орқали боғланган. Маҳалла раиси эса калтакланган ўқувчи қиз яшайдиган хонадон телефон рақамини беришни истамаган ва журналистнинг кейинги қўнғироқларига жавоб бермаган.
Аниқланишича, маҳалла раиси — мактаб директорининг турмуш ўртоғи. Ва бундан илгари ҳам оила вакиллари маҳалла раисига бир неча бор кўмак сўраб борган. Аммо доимий рад жавобини олиб келган.
Ҳудуд профилактика инспектори ўқувчи қизнинг оиласи нотинч оилалар рўйхатида турмаслигини билдирган. Худди шунингдек, вилоят ИИБ ахборот хизмати раҳбари Шуҳрат Жалолов ўқувчининг оиласи ҳақида тўхталган.
«Калтакланган қизнинг отаси Ғ.Ж. тракторчи, умр бўйи далада ишлаган, онаси уй бекаси. Оилада тўрт фарзанд бўлиб, икки нафар қизи турмушга чиққан. Бундан илгари ҳам оила вакиллари қўни-қўшнилар ёхуд маҳалла-кўй орасида ҳеч қандай жанжал ёки тортишувлар келтириб чиқармаган. Бу оила ҳеч қандай нотинч оилалар сирасига кирмайди ва улар жудаям оддий ва камтарин яшашади», — дейди Шуҳрат Жалолов.
Калтакланган қизнинг онаси ҳам мактаб директорининг гапини инкор этмоқда.«Бу қандай туҳмат бўлди? Нега менинг оилам нотинч оилалар сирасига кирар экан? Ҳеч қачон бировга шикоят қилмаган бўлсак, ким биландир жанжаллашмаган ёки уришмаган бўлсак, оиламиз тинч, тўнғич фарзандларимиз уйли-жойли, турмуши фаровон. Тушунмай қолдим. Чўкаётган одам хасга бўлсаям ёпишади, дейишгани шуми ёки? Қизимни аёвсиз калтаклаб, қўлини моматалоқ қилгач, бўлар-бўлмас гаплар тарқатишга уриняптими? Шуми педагог маданияти, шуми узоқ йиллик тажрибасига эга педагог важи? Тўғри, мактаб директори хатосини тан олиб, кечирим сўраб, уйимизга келди. Аммо хўжайиним унинг узрини қабул қилмади. Ҳар қандай ота-она ўз фарзандини менинг фарзандим ўрнига қўйиб кўрсин-чи? Фарзандингиз мактаб директори томонидан калтакланиб, моматалоқ бўлиб уйга қайтса, қандай ҳолатга тушасиз?! Қизимнинг отаси чидолмади, мактаб директорининг кечиримини қабул қилмади», — дейди қизнинг онаси З.Р.
Аёлнинг тан олишича, ўша куни эри даладан қайтгач, чарчоғини чиқариш учун бир пиёла спиртли ичимлик истеъмол қилган.
«Хонадон ичида, оила даврасида бир пиёла ароқ ичиш мумкин эмас, деб қаердадир ёзилганми? Дастурхон ёзилган вақтда мактаб директори уйимизга келди. Аммо турмуш ўртоғим бир оғиз ортиқча гапиргани йўқ, майли, ўйлаб кўраман, фақат ҳозир гаплашмайлик, опа, деб чуқур хўрсиниб, ичкари уйга кириб кетди. Мен ҳам хўжайиним нима десалар, у кишидан ошириб, бирор фикр айтолмайман, дедим. Шу билан биз билан хайрлашиб, мактаб директори чиқиб кетди, холос», — дейди йиғи аралаш З.Р.
Бухоро тумани ХТБ мудири Шамшод Саъдуллаев ўқувчи қизни аёвсиз калтаклаган мактаб директорининг хатти-ҳаракатини қаттиқ қоралаган.
«Ўқувчини тарбияга бошлаш ёхуд камчилиги учун унга психологик таъсир ўтказиш ўрнига, жаҳл устида уни калтаклаб, жароҳат етказган мактаб директорининг педагогга хос бўлмаган совуқ ва ўта қўпол ҳаракатини умуман оқлаб бўлмайди. У қонун олдида жавоб беради», — деди Шамшод Саъдуллаев.
Айни пайтда ички ишлар идоралари томонидан мактабдаги маънавий муҳитнинг ёмонлиги, ўқувчилар ўртасида одоб-ахлоқ нормаларининг бузилгани, Умида Жўраеванинг мактаб директори бўла туриб, ўқувчиларига тажовуз кўрсатгани нуқтаи назаридан унга нисбатан қонунда белгиланган тартибда чора кўриш ишлари бошлаб юборилган.
Изоҳ (0)