Тошкентдаги Янги Чоштепа 21 майдан буён электр таъминотидан узилган

Тошкент шаҳри Янгиҳаёт тумани ҳокимлиги 21 майдан буён электр таъминотида узилиш ҳолати юзага келгани сабаб Янги Чоштепа аҳолисига мурожаат билан чиқди.

Қайд этилишича, электр таъминотидаги узилишга маҳалладан ўтган 10 кВ кабел тармоқларида номаълум ташкилот томонидан ўзбошимчалик билан ер қазиш ишлари олиб борилгани сабаб бўлган. Оқибатда кабеллар шикастланиб, электр таминотида узилиш содир бўлган.

«Туни билан коммунал соҳа ходимлари томонидан носозликни бартараф этиш ишлари олиб борилди. Аммо битта носозлик бартараф этилиши билан иккинчи носозлик ҳолати келиб чиқди ва электр таъминотида қайта муаммо юзага келди», — дейилади ҳокимлик ахборотида.

Айни вақтда носозликни бартараф этиш ишлари олиб борилмоқда. Янгиҳаёт туман ҳокимлиги келтирилган ноқулайлик учун фуқаролардан узр сўраган.

«Ҳудудий электр тармоқлари» акциядорлик жамиятининг маълум қилишича, туманнинг Чоштепа кўчасида жойлашган пластмасса цехи ҳудудидан ўтган қуввати 10 кВ бўлган юқори кучланишли кабел тармоқларини номаълум пудратчи ташкилот туман электр таъминот корхонаси билан келишмаган ҳолда ўзбошимчалик билан ер қазиш ишлари олиб бориши оқибатида ер остидан ўтган кабел тармоқлари узиб юборилган.

Шу туфайли электр энергияси билан таъминланувчи Янгиҳаёт туманидаги «Чоштепа» маҳалласи, Янги Чоштепа кўп қаватли ҳамда ерли аҳоли яшаш хонадонларида электр энергияси таъминотида узилиш содир бўлган.

Айни пайтда ушбу ҳолат бўйича «Тошкент шаҳар электр тармоқлари» АЖ тасарруфидаги Янгиҳаёт туман электр таъминоти корхонаси ходимлари томонидан носозликларни бартараф этиш бўйича таъмирлаш ишлари олиб борилмоқда.

«Тез фурсатларда носозлик бартараф этилиб, электр таъминоти тикланишини маълум қиламиз», — дейилади хабарда.