Бандлик ва меҳнат муносабатлари вазири Нозим Ҳусанов «Дарё» билан суҳбатда 2022 йилнинг ўтган даври мобайнида 1600 нафардан ортиқ ўзбекистонлик ишлаш учун Жанубий Кореяга кетганини ва яхши меҳнат шароитларида иш бошлаганини маълум қилди.
«Пандемия даврида фуқароларимиздан жуда кўплаб мурожаатлар келиб тушди. Унда кўпчилик ишлаш учун хорижга кетиш нияти борлигини айтиб, чегаралар қачон очилишини сўраганди. Нафақат Ўзбекистонда, дунё мамлакатларида ҳам карантин талаблари юмшатилиб иш жараёнлари бошлангач, 2022 йилнинг ўтган даври мобайнида 1600 нафардан ортиқ ўзбекистонлик юртдошимиз ишлаш учун Жанубий Кореяга юборилди. Ва яхши меҳнат шароитларида иш бошлади», — дейди вазир Нозим Ҳусанов.
Вазирнинг маълумот беришича, 2022 йил бошида Жанубий Кореяга бориб ишламоқчи бўлган фуқаролар учун 14 кунлик карантин талаби бўлган.
«Элчи жаноблари билан суҳбатимизда бу талаб 2022 йилнинг апрель ойида 3 кунлик муддатга туширилгани, коронавирусга қарши эмлаш олган ўзбек мигрантлари учун янаям қулайлик яратиб берилгани ҳақида сўз юритилди. Жанубий Кореяга бориб, шартнома муддати тугагач ноқонуний равишда Корея Республикасида қолиб ишлаётган фуқароларимиз кўп. Қачонки, шу ҳолат якун топса, яъни шартнома муддати тугагач фуқароларимиз меҳнат миграциясидан қайтса, ўша давлатда Ўзбекистон ишчиларига бўлган талаб ортади ва квоталар сони кўпаяди. Шунинг учун биз фуқароларимизга қонуний тартибда ишлаш лозимлигини эслатиб, уларни шунга чақириб қолардик», — дейди вазир.
Меҳнат вазирининг айтишича, Жанубий Кореяга квотанинг оширилиши кўпинча ўзбек мигрантларининг ўзига боғлиқ.
Нозим Ҳусановнинг маълумот беришича, янги тартибга кўра эндиликда Жанубий Кореяга бориб, виза тугаш муддатига қадар бир жойда бир йилдан ортиқ муддат меҳнат фаолиятини давом эттирган мигрантларга иш берувчилар томонидан қайта шартномалар расмийлаштирилиб, Ўзбекистонга келиб имтиҳонсиз яна 4 йил-у 10 ойга Корея Республикасида ишини давом эттириш ҳуқуқи берилади.
«Аввал 4 йил-у 10 ой бир жойда ишлаган фуқароларга Ўзбекистонга келиб, яна қайтиб боришса, ҳеч қандай имтиҳонсиз ишлаш ҳуқуқи берилар эди. Муддати кам бўлса, имтиҳон топширишар эди», — деди вазир.
Изоҳ (0)