Ўзбекистонда 1 июндан иш ҳақи ва стипендиялар 12 фоизга оширилиши тўғрисида хабар берилганди. Блогер ва ҳуқуқшунос Хушнуд Худойбердиевнинг соғлиқни сақлаш вазири ўринбосари Отабек Фозилкаримовга таяниб ёзишича, иш ҳақининг ошиши тиббиёт ходимлари маошига ҳам таъсир қилади.
«Тиббиёт муассасалари ходимларини моддий қўллаб-қувватлаш ҳамда рағбатлантиришни кучайтириш чора-тадбирлари тўғрисида»ги президент фармони билан 1 июндан тиббиёт ходимларининг ойлик маоши 15 фоизгача оширилиши айтилган эди. 20 май куни қабул қилинган иш ҳақларини ошириш ҳақидаги президент фармони асосида барча ходимлар қаторида тиббиёт мутахассисларининг маоши ҳам яна 12 фоизга оширилади.
«Масалан, 3 миллион сўм ойлик оладиган тиббиёт ходимининг ойлиги дастлаб 15 фоизга ошади дейлик, шунда 3 миллион 450 минг сўм бўлади. Кейин яна 12 фоиз ошади ва жами 3 миллион 864 минг сўм бўлади», — деб ёзади Худойбердиев.
Президент фармонига кўра, Ўзбекистон ҳудудида энг кам иш ҳақи миқдори ойига 920 минг сўм, базавий ҳисоблаш миқдори — 300 минг сўм этиб белгиланди.
Изоҳ (0)