АҚШ ҳукумати Украинага Россиянинг Қора денгиздаги блокадасини енгиб ўтишга ёрдам берувчи замонавий кемага қарши ракеталарни топширишни режалаштирмоқда. Бу ҳақда Reuters АҚШ маъмурияти ва Конгрессдаги манбаларга таяниб хабар берди.
Қурол-яроғлар Киевга тўғридан-тўғри ёки ушбу турдаги қуроллар захирасига эга бўлган Европа давлати орқали юборилиши кутилмоқда. Манбаларнинг айтишича, бир қанча давлатлар Украинага Harpoon ракеталарини юборишга тайёр, аммо улар Россия кемаси ракета билан чўктирилган тақдирда, унинг қасос олишидан қўрқиб, ҳеч бири қуролларни биринчи етказиб беришни ёки ягона таъминотчи бўлишни истамаяпти.
Буюк Британия Мудофаа вазирлиги маълумотларига кўра, Қора денгиздаги операцион зонада Россия ҳарбий-денгиз кучларининг 20 га яқин кемаси, жумладан, сувости кемалари бор. Ҳарбий эксперт Брайан Кларкнинг агентликка айтишича, Россия кемаларига таҳдид қилиш ва Москвани блокадани олиб ташлашга мажбурлаш учун 12 тадан 24 тагача Harpoon типидаги ракеталар етарли бўлади.
Аввалроқ Politico нашри АҚШ Киевнинг сўровига қарамай, Украинани узоқ масофага баравар ўт очувчи реактив тизимлар билан таъминламаётгани ҳақида хабар берганди. Манбаларнинг сўзларига кўра, Оқ уй бундай қуроллар Россия ҳудудига зарба бериш учун қўлланилишидан, бу эса можарони фақат кенгайтириши ва чўзишидан хавотирда. Украина расмийлари ушбу турдаги қуролларни бир неча ойдан бери сўраб келади.
Шу билан бирга 19 май куни АҚШ сенати Украинага 40 миллиард доллар миқдорида қўшимча ёрдам ажратиш ҳақидаги қонун лойиҳасини бир овоздан маъқуллади. Сенаторлар қонунни ўтган ҳафтадаёқ тезкор тартибда қабул қилмоқчи эди, аммо республикачи Ренд Пол мазкур ҳужжатга бир қатор ўзгартиришлар киритиш юзасидан таклиф бериб, ушбу жараённи муайян вақтга блоклаган. Энди қонун кучга кириши учун уни АҚШ президенти Жо Байден имзолаши қолди.
Изоҳ (0)