Конституцияга ўзгартиришлар киритиш — сайловчиларнинг таклифлари. Бу ҳақда 20 май куни Олий Мажлис Сенати кенгаши ва Қонунчилик палатаси кенгашининг қўшма мажлисида Конституциявий комиссия раиси Акмал Саидов айтиб ўтди, деб хабар бермоқда «Дарё» мухбири.
Акмал Саидов ЎзЛиДеП ҳамда «Миллий тикланиш» партиясининг ташаббусларини қўллаб-қувватлашини таъкидлади. У, шунингдек, конституциявий комиссия тўғрисидаги низом ҳам жуда керакли эканлигини айтди.
Мен ўйлайманки, иккита кенгаш палаталари конституциявий ислоҳотни амалга ошириш бўйича дунёда тўпланган илғор тажрибага тўла мос келади. Мана шу ислоҳот керак экан, нима қилиш керак, деган саволга, албатта, комиссия тузиш керак. Унинг таркиби қандай бўлиши керак ва кенг кўламли комиссиянинг фаолияти нима асосда бўлиши керак — низом асосида. Бу ерда нафақат хорижий тажриба, балки ўзимизда 90 йилларда тўпланган миллий тажрибага ҳам таянишимиз керак.Маълумот учун, Акмал Саидов бир вақтнинг ўзида Олий Мажлиси Қонунчилик палатаси спикери биринчи ўринбосари, Инсон ҳуқуқлари бўйича Ўзбекистон Миллий маркази директори вазифасида ҳам фаолият юритади.Конституцияни ўзгартириш бўйича биринчи таклиф — Қорақалпоғистоннинг Бўзатов туманида сайловчилар билан учрашувда Сенат аъзоси томонидан берилди. Нима учун Конституцияда биз учун катта фожиа бўлган — Орол денгизининг қуриши, шунингдек, экологик ҳуқуқлар умуман кўрсатилмагани таъкидланди. Шунга ўхшаб 8 та вилоятдаги сайловчилар билан учрашувда бу каби таклифлар кўтарилди. Таклифларни мактаб ўқитувчиси, фермер кўтаряпти ва ҳоказо. Айтиш лозимки, бу сайлов вақтидаги сайловчиларнинг хоҳишлари.
«Миллий тикланиш» партияси кўтармаганми? Козимжон Тожиев (Олий Мажлис Қонунчилик палатаси депутати, «Миллий тикланиш» демократик партияси марказий кенгаши таркиби аъзоси — таҳр.) теледебатларда бу мавзуни кўтариб чиқди.
Яна бир нарсани айтаман, Ўзбекистон президенти сайловдан аввал сайловчилар учун «Янги Ўзбекистон стратегияси» китобини сайловолди дастури сифатида тақдим этди. Шу китоб сайловолди учрашувларда тушган таклифларни умумлаштирилиб, янги йилда «Янги Ўзбекистон тараққиёт стратегияси» номи билан иккинчи нашрда чоп этилди. Иккинчи нашрдаги китобда алоҳида бир боб пайдо бўлди. Бу Ўзбекистонда конституциявий ислоҳотларни амалга ошириш деган. Президентимиз сайловолди тушган барча таклифларни китобга киритдилар. Бу биринчи нашрда йўқ эди.
Ҳозирги кунда ижтимоий тармоқларни кузацангиз, кўпчилик нима учун конституциявий ислоҳот керак, деган нарсага тушунмаётганига гувоҳ бўлиш мумкин. Шу боис конституциявий комиссиянинг матбуот хизмати тузилишини жуда тўғри деб биламан. Чунки оддий фуқарога уни тушунадиган тилда нима учун конституциявий ислоҳот керак, унинг зарурати нимада, каби масалаларни тушунтириш керак. Тармоқларда иккита-учта бўлар-бўлмас, чаласавод «доҳийлар» пайдо бўлган ҳозир. Ана ўшалар гапиряпти. Ҳали Конституцияга ўзгартириш киритиш нима бўлаётганини, нима учунлигини тушунмасдан гапираётганлар бор. Шунинг учун матбуот хизматига катта вазифа юкланади.
Конституция — догма эмас. У ҳаракат учун дастур бўлиши керак, қотиб қолган эмас. Масалан, ўзимизни олайлик, бир инсон туғилади, ривожланади, у ҳам қотиб қолмаган. Жамият ҳам ривожланяпти. Янги Ўзбекистонга жавоб берадиган янги қоидаларни киритиш керак бўлади.
Акмал Саидов, Конституциявий комиссия раиси
Эслатиб ўтамиз, Шавкат Мирзиёев 8 декабрь — Конституция байрами муносабати билан Ўзбекистон халқига йўллаган табригида мамлакат асосий қомусига ўзгартиришлар киритилиши мумкинлиги ҳақида гапирганди.
16 май куни Олий Мажлис Қонунчилик палатасида ўтказилган йиғилишда Ўзбекистон Либерал-демократик партияси Конституцияга ўзгартириш ва қўшимчалар киритиш жараёнини бошлаш таклифи билан чиққан эди. 17 май куни Конституцияга ўзгартириш ва қўшимчалар киритиш борасидаги қарор лойиҳаси депутатлар томонидан маъқулланди.
«Миллий тикланиш» демократик партияси раиси Алишер Қодиров Ўзбекистоннинг бугунги ривожланиш босқичи янги Конституцияни тақозо қилаётганлигини айтганди.
20 май куни Ўзбекистон Конституциясига ўзгартириш киритиш ва ташкилий чора-тадбирларни амалга ошириш юзасидан Конституциявий комиссия тузилиб, унинг таркиби ва вазифалари белгиланди.
Маълумот ўрнида, Ўзбекистон Конституцияси 1992 йил 8 декабрда қабул қилинганидан буён унга 16 марта ўзгартириш ва қўшимчалар киритилган.
Изоҳ (0)