“Yetti marta emas, yetmish marta o‘ylab, xalqimiz bilan har tomonlama maslahatlashgan holda qabul qilishimiz kerak”. Shavkat Mirziyoyev Konstitutsiyaviy islohotlar haqida

Shavkat Mirziyoyev 8-dekabr — Konstitutsiya bayrami munosabati bilan O‘zbekiston xalqiga yo‘llagan tabrigida mamlakat asosiy qomusiga o‘zgartirishlar kiritilishi mumkinligi haqida gapirdi.

Qayd etilishicha, adolatli va xalqparvar davlat qurish yo‘lida muhim vazifalarni amalga oshirish uchun yangi konstitutsiyaviy makon va mustahkam qonunchilik bazasi kerak bo‘ladi. “Asosiy qonunimizni jamiyatdagi bugungi real voqelikka, shiddatli islohotlarimiz mantig‘iga moslashtirish, Yangi O‘zbekiston taraqqiyot strategiyasi uchun mustahkam huquqiy poydevor yaratish muhim vazifaga aylanmoqda”, — deya ta’kidlagan prezident o‘z tabrigida.

Ma’lum qilinishicha, ilgari amal qilib kelingan “davlat—jamiyat—inson” tamoyilini “inson—jamiyat—davlat” deb o‘zgartirish, uni milliy qonunchilik va huquqiy amaliyotda mustahkamlash, shuningdek, bosh qomusda oila institutini rivojlantirish, millatlararo totuvlikni yanada mustahkamlash bo‘yicha konstitutsiyaviy asoslarni belgilab qo‘yish zarur.

Hozirgi kunda O‘zbekiston ijtimoiy davlat va adolatli jamiyat qurish sari dadil bormoqda. Shu sababli Yangi O‘zbekiston — ijtimoiy davlat degan tamoyilni konstitutsiyaviy qoida sifatida muhrlashning vaqti-soati yetdi, deb o‘ylayman.

Inson huquqlarini himoya qilish bo‘yicha amaldagi tizimning samarasini oshirish maqsadida Konstitutsiyamizda bolalar mehnatiga yo‘l qo‘ymaslik, nogironlar, keksa avlod vakillarining huquqlarini ishonchli himoya qilish masalalari ham o‘z aksini topishi zarur.

Shavkat Mirziyoyev, O‘zbekiston prezidenti

Ta’kidlanishicha, ko‘plab rivojlangan davlatlar tabiatdagi global o‘zgarishlarni hisobga olib, o‘z konstitutsiyasiga ekologiyaga oid maxsus boblar kiritmoqda. O‘zbekiston Konstitutsiyasida ham ushbu dolzarb masalaga doir huquqiy normalar ustuvor o‘rin egallashi lozim.

Konstitutsiyani yangilashdek g‘oyat muhim, strategik vazifani hal etishda biz yetti marta emas, yetmish marta o‘ylab, xalqimiz bilan har tomonlama maslahatlashgan holda, yurtimiz va jahondagi ilg‘or tajribalarni chuqur o‘rganib, aniq qaror qabul qilishimiz zarur. Ushbu muhim siyosiy hujjatni 2022-yil Konstitutsiyaning 30 yillik bayrami nishonlanadigan kunlarda qabul qilish, o‘ylaymanki, milliy davlatchilik an’analarimizga, xalqimiz manfaatlariga munosib ish bo‘ladi”, — deydi Shavkat Mirziyoyev.