Бандлик ва меҳнат муносабатлари вазирлиги «Хорижда вақтинча меҳнат фаолиятини амалга ошириб Ўзбекистон Республикасига қайтиб келган фуқароларни иш билан бандлигини таъминлаш бўйича қўшимча чора-тадбирлари тўғрисида»ги президенти қарори лойиҳасини муҳокамага қўйди.
Қарор лойиҳасига кўра, 2022 йил 1 июлдан 2023 йил 1 январгача Бандликка кўмаклашиш давлат жамғармаси маблағлари ҳисобидан хориждан қайтиб келган меҳнат мигрантларини ишга қабул қилган иш берувчиларга (бюджет ташкилотлари, давлат корхоналари,устав жамғармаси (капитали)да давлат улуши 50 фоиз ва ундан ортиқ бўлган юридик шахслар бундан мустасно) ҳар бир ходим учун 6 ой давомида ҳар ойда базавий ҳисоблаш миқдорининг 1,5 баравари миқдорида (405 минг сўм) субсидия берилади.
Бунда, хориждан қайтиб келган меҳнат мигрантларини ишга қабул қилган ташкилотга субсидия беришда Ягона миллий меҳнат тизимида рўйхатдан ўтказилган меҳнат шартномаси асос ҳисобланади.
Шунингдек, 2022 йил 1 июлдан хорижда меҳнат фаолиятини амалга ошириш натижасида орттирган маблағлари ҳисобидан Ўзбекистонда тадбиркорликни йўлга қўймоқчи бўлган меҳнат мигрантлари томонидан тадбиркорлик фаолиятини ташкил этиш учун «50 х 50» тамойили асосида дастур жорий этилади. Бунда:
- лойиҳа умумий қийматининг 50 фоизи миқдорида, лекин базавий ҳисоблаш миқдорининг 150 бараваридан кўп бўлмаган миқдорда Бандликка кўмаклашиш давлат жамғармаси ҳисобидан субсидия ажратилади;
- ажратиладиган субсидиялар ҳар бир ишга қабул қилинган фуқаро учун базавий ҳисоблаш миқдорининг 30 бараваридан ошмаслиги керак;
- субсидия ажратишда Ягона миллий меҳнат тизимида рўйхатдан ўтказилган меҳнат шартномаси асос ҳисобланади.
- дастур доирасида ТИФ «Миллий банк», АТ «Халқ банки» ва АТ «Саноатқурилишбанк» томонидан камида 1 минг нафар меҳнат мигрантига ишлаб чиқариш, қишлоқ хўжалиги, қурилиш, транспорт, хизмат кўрсатиш йўналишидаги ҳар бир лойиҳа учун базавий ҳисоблаш миқдорининг 500 бараваригача кредит ажратилади;
- кредит олмоқчи бўлган фуқаронинг меҳнат миграциясидан қайтганлиги Ташқи меҳнат миграцияси агентлигининг labor-migration дастурий мажмуасида қайд этилган маълумотлар асосида тақдим этиладиган тасдиқнома билан тасдиқланади;
- дастурни амалга ошириш учун Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағларидан мазкур кичик бандда кўрсатилган банкларга 30 миллиард сўм миқдорида ресурс ажратилади;
- кредит ресурслари Реинтеграция маркази раҳбари ва Ташқи меҳнат миграцияси агентлигининг ҳудудий филиаллари томонидан тақдим этиладиган манзилли рўйхат асосида молиялаштирилади;
- дастур доирасида 33 миллион сўмгача ажратилаётган кредит маблағлари маҳаллалардаги ҳоким ёрдамчилари тавсиясига асосан гаров таъминотисиз ажратилади.
Изоҳ (0)