Наманган вилояти Норин туманида фуқарони ўқишга киритиб қўйишни ваъда қилган фирибгар ва унинг Тошкент шаҳридаги шериги ушланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Норин тумани ва ДХХнинг Учқўрғон туманлараро бўлимлари томонидан тезкор тадбир ўтказилган. Унда фуқаро Қ.Н. бошқа бир фуқаро Ш.ни гўёки Давлат тест марказида ишловчи таниши орқали ўқишга киритиб қўйишни ваъда қилгани аниқланган. У эвазига 7 минг долларни олган вақтида ушланган.
Унинг кўрсатувига асосан Тошкент шаҳрида давом этган тадбирда Шайхонтоҳур туманида яшовчи фуқаро С.Б. фуқаро Ш.ни Наманган муҳандислик технология институтининг иқтисодиёт факультетига ўқишга киритиб қўйиш эвазига 6,5 минг долларни олган вақтида ашёвий далиллар билан қўлга олинган.
Ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилган. Ҳозирда тергов ҳаракатлари ўтказилмоқда.
Мавзуга доир:
- Сирдарёда фуқароларни 3500 доллар эвазига Гулистон давлат университетига киритиб қўймоқчи бўлган талаба ушланди
- Самарқандда фуқаронинг Қирғизистондаги ўқишини кўчириб бериш учун 1,4 минг доллар олган шахс ушланди
- Самарқандда хориждан ўқишни кўчириш учун қалбаки ҳужжат тайёрлаб бериш эвазига 2 минг доллар олган шахс ушланди
Изоҳ (0)