19 май куни «Миллий тикланиш» демократик партияси фракциясининг йиғилишида депутатлар «Ўзбекистон Республикаси Маъмурий жавобгарлик тўғрисидаги кодексига ўзгартишлар киритиш ҳақида»ги қонун лойиҳасини муҳокама қилди. Бу ҳақда партия матбуот хизмати хабар берди.
Ушбу қонун лойиҳаси билан Миллий гвардияга жамоат тартибига тажовуз қилинган ҳуқуқбузарликларни кўриб чиқиш ва маъмурий баённомаларни расмийлаштириш ваколати берилмоқда.
Шунингдек, депутатлар «Йўл ҳаракатини ташкил этиш тўғрисида»ги қонуни лойиҳасини ҳам муҳокама қилган. Таъкидланишича, бугунги кунда йўлларнинг ҳолати ўсиб бораётган транспорт воситаларининг тирбандликларсиз ҳаракатланишини таъминлашга жавоб бермайди. Бу борада жамоатчилик иштирокини белгиловчи нормалар мавжуд эмас. Бундай камчилик ва муаммоларни бартараф этиш бўйича норматив-ҳуқуқий ҳужжатни ишлаб чиқиш зарурати туғилмоқда.
Йиғилиш давомида фракция раҳбари Алишер Қодиров йўл таъмирлаш ишларини фақат тунги вақтларда амалга ошириш кераклигини, чунки иш вақтидаги бундай ҳаракат катта тирбандликни келтириб чиқараётганини таъкидлаган.
«Бугун бу жараённи қонунчилик билан тартибга солиш, яъни йўл таъмирини фақат тунги вақтларда амалга ошириш вақтини қонун билан аниқ белгилаш керак. Бу дунё тажрибасида бор», – дейди фракция етакчиси.
Эслатиб ўтамиз, февраль ўрталарида Олий Мажлис Қонунчилик палатаси спикери ўринбосари, депутат Алишер Қодиров йўлларда хавфсизликни таъминлаш масаласига бағишланган йиғилишда иштирок этганини маълум қилиб, қоидабузарларни жазолаш, тирбандликларнинг олдини олиш борасидаги фикрлари билан бўлишганди. Ўшанда у «Нима учун давлат хизматида иш бошлаш вақтини 08:30, олийгоҳларда ўқиш бошлаш вақтини 10:00 га белгилаш мумкин эмас? Осмон узилиб ерга тушмайди», деганди.
Изоҳ (0)