Афғонистон Тожикистон ва Ўзбекистондан импорт қилинаётган электр энергияси учун 100 миллион доллар қарздор бўлиб қолган. Бу ҳақда ТОLО News энергетика ва сув ресурслари вазирлигига таяниб хабар бермоқда.
Шу билан бирга, агентлик маълумотларига кўра, вазирлик вакили Ахтар Муҳаммад Нусрат улар тўлашга тайёрлигини, аммо Марказий Осиё мамлакатларидаги банкларда ҳозир пул ўтказмалари билан боғлиқ қийинчиликлар борлигини таъкидлади.
Афғонистоннинг Da Afghanistan Breshna Sherkat (DABS) собиқ раҳбари Омонулла Ғолиб маълум қилишича, Афғонистон Марказий Осиё мамлакатларига электр энергияси сотиб олиш учун йилига қарийб 300 миллион доллар тўлайди.
«Афғонистон ўз электр энергиясининг катта қисмини Ўзбекистондан сотиб олади. Бу йилига тахминан 108 миллион долларни ташкил қилади. Ҳозир ҳисобларни тўлашда муаммо бўлмоқда», — деди у ва Украинадаги уруш қўшни мамлакатлар учун банк жараёнини мураккаблаштирганини таъкидлади.
Шу йилнинг январида Душанбедаги матбуот анжуманида «Барки Точик» ОАХК раҳбари Маҳмадумар Асозода DABS’нинг Тожикистон олдида электр энергиясидан қарзи 33 миллион долларни ташкил этишини айтганди.
Афғонистон ўз электр энергиясининг 80 фоиздан ортиғини қўшни мамлакатлардан импорт қилади ва агар ушбу мамлакатлар электр энергиясини ўчириб қўйса, ўн миллиондан зиёд афғонларнинг уйларида чироқ ўчади, деб фикр билдиради экспертлар.
Юзага келган қарздорликни тўлаш билан боғлиқ асосий муаммони «Барки точик» раҳбари Афғонистон банк тизимидаги мураккаб вазият билан боғлади. Унинг қайд этишича, айни пайтда Афғонистон банклари DABS’га тожик электр энергиясига тўлаш учун ҳафтасига фақат 2 миллион доллар тақдим этиши мумкин.
2021 йил октябрь ойида Афғонистон энергетика компаниясининг Ўзбекистон, Тожикистон, Туркманистон ва Эронга электр энергияси учун 51 миллион доллардан ортиқ қарзи борлиги хабар қилинган эди. Бироқ Ўзбекистон бош вазири ўринбосари Сардор Умурзоқовнинг сўзларига кўра, Афғонистон муваққат ҳукумати электр энергияси бўйича қарзини тўлиқ қоплаш мажбуриятини олган ва Ўзбекистон «бир соат ҳам» Кобулга электр энергияси етказиб беришни тўхтатмаган.
Шу йил бошида эса Ўзбекистон ва Афғонистон 2022 йилда электр энергияси етказиб бериш бўйича 100 миллион долларлик шартнома имзолади. Қайд этилишича, Марказий Осиёнинг ягона энергетика тизими Афғонистонга фақат Ўзбекистон орқали уланган. Ягона энергия тизими мамлакатларида ишлаб чиқарилган электр энергияси фақат Ўзбекистондан экспорт қилиниши мумкин.
Изоҳ (0)