Мамлакатимизнинг иқтисодий салоҳиятини ривожлантириш ва мустаҳкамлашда кон-металлургия саноатининг аҳамияти муҳим ҳисобланади. Соҳага оид корхоналарда меҳнат қилаётган кўп минг кишилик жамоаларининг кон-металлургия саноатини ривожлантириш ҳамда кадрлар тайёрлашга қўшган ҳиссаларини қайд этган ҳолда, май ойининг учинчи якшанбаси Ўзбекистон Республикасининг Кон-металлургия саноати ходимлари куни этиб белгиланган. Яхши анъанага кўра, мазкур сана Олмалиқ кон-металлургия комбинатида ҳам катта тантаналар билан кутиб олинди.
Жумладан, 13 май куни ОКМК спорт мажмуасида катта байрам тадбири ташкил этилди. Тадбир аввалида Ўзбекистон Республикаси Бош вазирининг комбинат меҳнат жамоасига йўллаган табриги ўқиб эшиттирилди. Шундан сўнг ОКМК бошқаруви раиси Абдулла Хурсанов барча комбинат ишчи ходимларини самимий муборакбод этди.
Тадбир давомида комбинат таркибий бўлинмаларида меҳнат қилиб келаётган ишчи ходимлар «Кончилик шуҳрати» кўкрак нишони билан тақдирланди. Байрам тадбири машҳур санъаткорлар иштирокида катта концерт дастури билан якунланди.
14 май куни эса катта халқ сайли ташкил этилди. Тадбирлар «Металлург» маданият саройи биноси олдида, «Ёшлар» ва «Болажон» боғлари ҳудудида бўлиб ўтди. Унда комбинат таркибий бўлинмалари ўз павильонларини ташкил этиб, экспонатлар, маҳсулотлар ва макетлар кўргазмасини намойиш этишди. Шунингдек, сайл давомида турли хил кўнгилочар дастурлар ташкил этилди.
Байрам сайли сўнгида Ўзбекистонда хизмат кўрсатган артист Камолиддин Ўринбоев бошчилигидаги Ўзбекистон давлат симфоник оркестри ижросидаги концерт дастури бўлиб ўтди.
Таъкидлаб ўтиш лозимки, комбинатда касб байрами барча ишлаб чиқариш вазифаларини уддалаган ҳолда қарши олди. Хусусан, товар маҳсулотлари ишлаб чиқариш башорат кўрсаткичлари ўтган тўрт ой давомида 121,8 фоизни ташкил қилди. Мис, полиметалл, олтин таркибли рудаларни қазиб олиш, уни қайта ишлаш, катодли мис, сульфат кислотаси, мис қувурлари, молибден ва бошқа кўплаб кўрсаткичлар йил бошидан бери ортиғи билан бажарилди.
Шу билан бирга инвестициявий лойиҳалар ҳам жадал суръатларда давом эттирилмоқда. «Ёшлик I» конини очиш ишлари олиб борилаяпти. 3-мис бойитиш фабрикасининг бўлажак корпуслари бугун бирин-кетин қад ростламоқда.
Маълумот учун, «Олмалиқ кон-металлургия комбинати» акциядорлик жамияти мамлакатимизда ушбу йўналишдаги энг йирик ва истиқболли корхоналардан бири бўлиб, унинг ишлаб чиқариш қувватлари Тошкент, Жиззах, Наманган ва Сурхондарё вилоятлари ҳудудларида жойлашган мис-порфир, қўрғошин-рух ва олтин-кумуш конлари гуруҳи захираларига асосланган. «Қалмоққир», «Ковулди» конлари, «Сари-Чўққи» карери, Ангрен ва Чодак кон бошқармалари, «Хондиза» конининг бой захиралари мавжудлиги ушбу комбинатнинг иқтисодий қувватини жадал ошириш, маҳсулот турларини кенгайтириш имконини беради. Ҳозир «Олмалиқ КМК» томонидан юздан ортиқ номдаги маҳсулотларнинг 54 фоизи ташқи бозорга етказилмоқда.
Экспорт кўрсаткичлари корхона иқтисодий салоҳиятининг йил сайин ўсиб бораётганидан далолат беради. Агар 2017 йилда корхона ташқи бозорга қарийб 643,1 миллион долларлик маҳсулот етказиб берган бўлса, 2021 йилда экспорт 1 124,2 миллион долларгача кўтарилди ва ўсиш суръати 136,8 фоизни ташкил этди.
Ўзбекистонда кумуш ишлаб чиқаришнинг тахминан 90 фоизи ва олтин ишлаб чиқаришнинг 20 фоизи мазкур комбинат улушига тўғри келади. Шунингдек, у нафақат Ўзбекистонда, балки бутун Марказий Осиё минтақасида энг йирик мис ишлаб чиқарувчиси ва ундан тайёрланган маҳсулотларни ички-ташқи бозорларга етказиб берувчи ҳисобланади.
Ҳозирги вақтда комбинат 18 турдаги экспортбоп, юқори ликвидли маҳсулотларни сотмоқда. Улар ичида мис асосийсидир. Бугунги кунда ОКМК мис ишлаб чиқариш ҳажми бўйича Россия ва Қозоғистондан кейин учинчи ўринда туради.
Маълумот шериклик ҳуқуқи асосида тайёрланди.
Изоҳ (0)