Швеция ва Финляндиянинг НАТОга киритилишини маъқуллаш эвазига Туркия F-35 учувчиларини тайёрлаш дастурга қайтарилишини ва Россиядан C-400 хариди учун санкциялар бекор қилинишини талаб қилмоқда. Бу ҳақда Bloomberg туркиялик юқори мансабли манбаларига таяниб хабар берди.
Яна бир шарт ушбу икки мамлакат курд ташкилотларини омма олдида қоралаши ва Курдистон ишчилар партиясини террорчилик ташкилоти деб тан олишидан иборат. Анқара, шунингдек, Швеция ва Финляндия томонидан ўзига қурол етказиб берилишига қўйилган чекловлар олиб ташланишини талаб қилди (улар Туркиянинг Суриядаги операциялари туфайли 2019 йилдан буён амал қилиб келади).
Агентлик манбалари аниқлик киритишича, Туркиянинг 1980 йилда Греция НАТО таркибига қайтарилишига берган расмий розилиги энди хато деб кўрилмоқда, Туркия раҳбарияти эса унинг Скандинавия мамлакатлари билан ҳам такрорланишини истамаган бўларди (Туркий ава Греция ўртасида Кипр туфайли зиддиятлар бор).
Финляндия ва Швеция Россия Украинада ҳарбий операция бошлаганидан кейин НАТОга қўшилиш ҳақида қарор қабул қилди. 17 май куни мамлакатлар расмий аризаларини топширди. Финляндия президенти Саули Ниинистё ва Швеция бош вазири Магдалена Андерссон қўшма матбуот анжуманида НАТОга қўшилиш ҳақидаги аризалар 18 май куни берилишини маълум қилди.
Швеция халқаро бетарафлик (нейтраллик)ни XIX асрдан буён сақлаб келади. Финляндия Иккинчи жаҳон уруши тугаганидан бери, қарийб 80 йил мобайнида бетараф мамлакат бўлиб келган.
Финляндия ва Швеция НАТОга кириши учун аризалар альянс бошқармасининг асосий сиёсий органи — Шимолий Атлантика кенгашида кўриб чиқилиши шарт. Шундан кейин мамлакатларнинг альянсга аъзо бўлиши ҳақидаги битим ҳарбий-сиёсий блок таркибидаги 30 та давлатнинг барчасида миллий даражада ратификация қилиниши керак.
16 май куни Туркия президенти Ражаб Тоййиб Эрдўғон Анқара Финляндия ва Швециянинг НАТОга қўшилишига розилик бера олмаслигини айтганди. У буни мамлакатлар Туркияга «террорчилар»ни топширишни истамаётгани билан изоҳлади. Аввалроқ Швеция ва Финляндия Курдистон ишчилар партияси ва FETO (турк ёзувчиси Фатхулла Гулен мафкураси атрофида юзага келган ҳаракат бўлиб, уни Туркия 2016 йилдаги давлат тўнтаришига уринишга алоқадор деб ҳисоблайди) аъзоларини экстрадиция қилишдан бош тортгани хабар берилганди.
Изоҳ (0)