Тожикистон Ички ишлар вазирлиги мамлакатда аксилтеррорчилик операциясини эълон қилди, деб хабар бермоқда Tengrinews.
Идора маълумотларига кўра, уюшган жиноий гуруҳ аъзолари жамоатчилик-сиёсий вазиятни беқарорлаштириш мақсадида бевосита давлат чегараси чизиғида, Рушон туманидаги автомобиль йўлида Душанбе—Кўлма халқаро автотрассасини ноқонуний равишда тўсиб қўйган.
«Жиноятчилар халқаро террорчилик ташкилотлари кўмагида мамлакат ташқарисида қурол ва ўқ-дориларни қўлга киритган, шунингдек, террорчилик ҳаракатларини ва бошқа шаклдаги провокацияларни амалга ошириш учун чет эллик ёлланма аскарларни жалб қилган», — дейилади ИИВ хабарида.
Авеста портал маълумотларига қараганда, уюшган жиноий гуруҳ аъзолари ҳуқуқ-тартибот органлари ходимларининг қурол ва ўқ-дориларни топшириш ҳақидаги қонуний талабларини бажармаган ва қуролли қаршилик кўрсатган. Шу вақтга келиб Рушон туманидаги йўлнинг бир қисмида Тожикистон ҳуқуқ-тартибот органлари томонидан аксилтеррорчилик операцияси бошланган.
Қўлга олинганлар ва жабрланганлар ҳақидаги тафсилотлар ошкор этилганича йўқ.
Баъзи ОАВлар ёзишича, аслида Рушон туманида ҳукумат қўшинлари ва Хоруғ шаҳрига олиб борувчи йўлни тўсган аҳоли ўртасида тўқнашувлар бўлиб ўтган, оқибатда бир неча киши жабрланган.
Эслатиб ўтамиз, Тожикистондаги Тоғли Бадахшон мухтор вилоятининг Хоруғ шаҳрида 14 май куни бир неча юзлаб аҳоли норозилик акциясига чиқиб, вилоят раҳбари Алишер Мирзонабот ва Хоруғ мери Ризо Назарзоданинг истеъфосини талаб қилган эди. Ҳукумат ушбу хатти-ҳаракатларни терроризм деб баҳолаши ва уларга тегишлича жавоб кўрсатишини маълум қилганди.
Мавзуга доир:
Изоҳ (0)