Апрель ойида Ўзбекистонда автомобилларга бўлган талаб бирламчи бозорда яна жадал ўса бошлади. Бу ҳақда Иқтисодий тадқиқотлар ва ислоҳотлар маркази «Дарё»га маълум қилди.
Айни пайтда иккиламчи бозорда автомобилларни расмийлаштириш учун йиғимларнинг бекор қилиниши таъсирлари давом этмоқда.
2022 йил апрель ойида 129,1 минг дона автотранспорт воситалари давлат рўйхатидан ўтказилди ва бу ўтган йилнинг апрель ойига нисбатан 63,3 мингга ёки 104 фоизга кўпроқ.
Шу билан бирга, жорий йилнинг март ойига нисбатан сотувлар ҳажми 15,1 фоизга кўпайган.
2022 йил 1 январдан бошлаб иккиламчи бозордан сотиб олинган автомобилларни давлат рўйхатидан ўтказиш нархи пасайтирилди ва ушбу ўзгаришларнинг таъсири апрель ойида ҳам давом этди.
Иккиламчи бозор
2021 йилда иккиламчи бозорда бир ойда ўртача 40 минг дона автотранспорт воситалари сотилган бўлса, жорий йил апрель ойида ушбу кўрсаткич 96,9 минг донани ташкил этди.
Рақамлар январь ойида 85,3 минг донага, февраль ойида 101 минг донага, март ойида 84,7 минг донага етган эди.
Бирламчи бозор
Бирламчи бозорда сотиб олинган автомобиллар сони 32,1 минг донани ташкил этиб, март ойига (27,5 минг) нисбатан 16,9 фоизга кўпайди. 2021 йил апрель ойига (21,3 минг) нисбатан автомобиль савдоси 51 фоизга ошди.
Март ойи билан таққослаганда янги автомобиллар савдосида сезиларли даражада ўсиш Наманган (77 фоиз), Қашқадарё (38 фоиз), Тошкент (37 фоиз) вилоятларида кузатилди. Самарқанд (-4 фоиз) вилоятида пасайиш қайд этилди.
Аввалроқ март ойида маҳаллий автомобиллар олди-сотдиси бўйича охирги 14 ой ичида рекорд қайд этилгани ҳақида хабар берилган эди.
Изоҳ (0)