Ўзбекистон ОТМларига қабул квоталарини тасдиқлашга оид қарор лойиҳаси муҳокамага қўйилди

Иқтисодий тараққиёт ва камбағалликни қисқартириш вазирлиги «2022/2023-ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида»ги президенти қарори лойиҳасини муҳокамага қўйди.

Ҳужжат лойиҳасига кўра, 2022/2023-ўқув йилидан бошлаб:

• олий таълим муассасаларининг имкониятларидан келиб чиққан ҳолда таълимнинг масофавий шакли жорий этилади;
• молиявий ва академик мустақиллик берилган олий таълим муассасаларининг тўлов-контракт асосидаги қабул параметрлари олий таълим муассасалари Кузатув кенгашлари томонидан мустақил белгиланади;
• давлат олий таълим муассасалари магистратура босқичида таҳсил олувчи хотин-қизларнинг тўлов-контракт пуллари тўлиқ давлат бюджети маблағлари ҳисобидан қоплаб берилади;
• абитуриентларни онлайн рўйхатдан ўтказиш 15 июнидан 15 июлига қадар (15 июль куни ҳам) бўлган муддатда Ягона интерактив давлат хизматлари портали ҳамда Давлат тест марказининг расмий веб-сайти орқали амалга оширилади.

Бунда, чет тили фанидан касбий (ижодий) имтиҳон ўтказиладиган таълим йўналишларига онлайн рўйхатдан ўтиш 15 июнидан 5 июлига қадар (5 июль куни ҳам) амалга оширилади. Тест синови топшириладиган фанлар мажмуаси ва фанлар кетма-кетлиги бир хил бўлган бештагача бакалавриат таълим йўналишларини ҳамда бир вақтнинг ўзида барча таълим шаклларини танлаш имконияти яратилади.

2022/2023-ўқув йили учун давлат буюртмаси параметрлари:

бакалаврлар тайёрлаш бўйича:

• кундузги таълим шаклига — 76 728 нафар;
• сиртқи таълим шаклига — 27 365 нафар;
• кечки таълим шаклига — 2 575 нафар;
• масофавий таълим шаклига— 3 610 нафар.

магистрлар тайёрлаш бўйича — 11 082 нафар.

Хорижий олий таълим ташкилотлари ва уларнинг филиаллари ҳамда нодавлат олий таълим ташкилотларида давлат гранти асосида кадрлар тайёрлаш бўйича — 100 нафар квота ажратилади.

Филиаллар ва нодавлат олий таълим ташкилотларига ажратилган 100 нафар грантларнинг буюртмачиси сифатида Олий ва ўрта махсус таълим вазирлиги белгиланади.

Шунингдек, молиявий ва академик мустақиллик берилган олий таълим муассасаларининг Кузатув кенгашлари бир ҳафта муддатда олий таълим муассасаларига тўлов-контракт асосидаги қабул параметрларини тасдиқлайди. Бунда, тўлов-контракт асосидаги қабул параметрлари сони мос йўналишга белгиланган давлат гранти асосидаги қабул параметрларидан камида икки баробар кўп бўлиши белгиланади.

Магистратурада таҳсил олувчи хотин қизларнинг тўлов-контракт пуллари:

• 2021/2022-ўқув йилида республика давлат олий таълим муассасалари магистратурасига талабаликка қабул қилиниб, тўлов-контракт асосида таҳсил олаётган хотин-қизларнинг 2022/2023-ўқув йили учун;
• 2022/2023-ўқув йилидан бошлаб, республика давлат олий таълим муассасалари магистратурасига ажратилган қабул параметрлари доирасида базавий тўлов-контракт асосида талабаликка қабул қилинган хотин-қизларнинг ўқиши учун контракт тўловлари давлат бюджетидан қоплаб борилади.

Молия вазирлиги, Олий ва ўрта махсус таълим вазирлиги билан биргаликда икки ой муддатда Давлат олий таълим муассасаларининг магистратура босқичига тўлов-контракт асосида қабул қилинган ва таълим олаётган хотин-қизларнинг тўлов-контракт суммасини давлат бюджети маблағлари ҳисобидан қоплаб бериш тартибини тасдиқлаш учун Вазирлар Маҳкамасига киритади.

Эслатиб ўтамиз, 2021/2022-ўқув йили учун давлат буюртмаси параметрларига кўра бакалаврлар тайёрлаш бўйича (кундузги таълим шаклига) — 113 530 та квота ажратилган эди.