17 май куни Ўзбекистон Давлат хавфсизлик хизмати раиси Абдусалом Азизов қирғизистонлик ҳамкасби — Давлат хавфсизлик миллий қўмитаси раиси Қамчибек Ташиев билан учрашди, деб хабар беради «КNews.kg».
Учрашув давомида махсус хизматлар раҳбарлари вертолётда ўзбек—қирғиз чегарасининг Жалолобод вилояти Ола-буқа туманидаги белгиланмаган қисмини кўздан кечирган. Шунингдек, томонлар учрашув давомида турли масалалар бўйича фикр алмашган ва тегишли қарор қабул қилган.
Эслатиб ўтамиз, 5 май куни Жалолобод вилоятининг Ола-Буқа тумани «Актам» қишлоқ фуқаролар йиғинида Ўзбекистон ДХХ Чегара қўшинлари чегарачилари уч нафар Қирғизистон фуқаросига нисбатан қурол ишлатганди. Оқибатида 48 ёшли А.К., 24 ёшли А.Ж. ва 22 ёшли А.К. ярадор ҳолатда Ола-Буқа туманидаги шифохонага етказилган. Улар кўрсатилган ёрдамга қарамай, ҳушига келмай, олган жароҳатлари оқибатида вафот этган.
Содир бўлган ҳолат юзасидан Қирғизистоннинг Ола-Буқа йўналиши бўйича чегара хизмати вакили зудлик билан Ўзбекистоннинг Янгиқўрғон йўналиши бўйича чегара хизмати вакили билан учрашув ўтказган. Томонлар хизмат текширувлари якуни бўйича 6 май куни учрашишга келишиб олган. Содир бўлган ҳолат юзасидан тегишли органлар томонидан тергов ҳаракатлари бошланган эди.
Изоҳ (0)