O‘zbekiston OTMlariga qabul kvotalarini tasdiqlashga oid qaror loyihasi muhokamaga qo‘yildi

Iqtisodiy taraqqiyot va kambag‘allikni qisqartirish vazirligi “2022/2023-o‘quv yilida O‘zbekiston Respublikasining oliy ta’lim muassasalariga o‘qishga qabul qilishning davlat buyurtmasi parametrlari to‘g‘risida”gi prezidenti qarori loyihasini muhokamaga qo‘ydi.

Hujjat loyihasiga ko‘ra, 2022/2023-o‘quv yilidan boshlab:

• oliy ta’lim muassasalarining imkoniyatlaridan kelib chiqqan holda ta’limning masofaviy shakli joriy etiladi;
• moliyaviy va akademik mustaqillik berilgan oliy ta’lim muassasalarining to‘lov-kontrakt asosidagi qabul parametrlari oliy ta’lim muassasalari Kuzatuv kengashlari tomonidan mustaqil belgilanadi;
• davlat oliy ta’lim muassasalari magistratura bosqichida tahsil oluvchi xotin-qizlarning to‘lov-kontrakt pullari to‘liq davlat budjeti mablag‘lari hisobidan qoplab beriladi;
• abituriyentlarni onlayn ro‘yxatdan o‘tkazish 15-iyunidan 15-iyuliga qadar (15-iyul kuni ham) bo‘lgan muddatda Yagona interaktiv davlat xizmatlari portali hamda Davlat test markazining rasmiy veb-sayti orqali amalga oshiriladi.

Bunda, chet tili fanidan kasbiy (ijodiy) imtihon o‘tkaziladigan ta’lim yo‘nalishlariga onlayn ro‘yxatdan o‘tish 15-iyunidan 5-iyuliga qadar (5-iyul kuni ham) amalga oshiriladi. Test sinovi topshiriladigan fanlar majmuasi va fanlar ketma-ketligi bir xil bo‘lgan beshtagacha bakalavriat ta’lim yo‘nalishlarini hamda bir vaqtning o‘zida barcha ta’lim shakllarini tanlash imkoniyati yaratiladi.

2022/2023-o‘quv yili uchun davlat buyurtmasi parametrlari:

bakalavrlar tayyorlash bo‘yicha:

• kunduzgi ta’lim shakliga — 76 728 nafar;
• sirtqi ta’lim shakliga — 27 365 nafar;
• kechki ta’lim shakliga — 2 575 nafar;
• masofaviy ta’lim shakliga— 3 610 nafar.

magistrlar tayyorlash bo‘yicha — 11 082 nafar.

Xorijiy oliy ta’lim tashkilotlari va ularning filiallari hamda nodavlat oliy ta’lim tashkilotlarida davlat granti asosida kadrlar tayyorlash bo‘yicha — 100 nafar kvota ajratiladi.

Filiallar va nodavlat oliy ta’lim tashkilotlariga ajratilgan 100 nafar grantlarning buyurtmachisi sifatida Oliy va o‘rta maxsus ta’lim vazirligi belgilanadi.

Shuningdek, moliyaviy va akademik mustaqillik berilgan oliy ta’lim muassasalarining Kuzatuv kengashlari bir hafta muddatda oliy ta’lim muassasalariga to‘lov-kontrakt asosidagi qabul parametrlarini tasdiqlaydi. Bunda, to‘lov-kontrakt asosidagi qabul parametrlari soni mos yo‘nalishga belgilangan davlat granti asosidagi qabul parametrlaridan kamida ikki barobar ko‘p bo‘lishi belgilanadi.

Magistraturada tahsil oluvchi xotin qizlarning to‘lov-kontrakt pullari:

• 2021/2022-o‘quv yilida respublika davlat oliy ta’lim muassasalari magistraturasiga talabalikka qabul qilinib, to‘lov-kontrakt asosida tahsil olayotgan xotin-qizlarning 2022/2023-o‘quv yili uchun;
• 2022/2023-o‘quv yilidan boshlab, respublika davlat oliy ta’lim muassasalari magistraturasiga ajratilgan qabul parametrlari doirasida bazaviy to‘lov-kontrakt asosida talabalikka qabul qilingan xotin-qizlarning o‘qishi uchun kontrakt to‘lovlari davlat budjetidan qoplab boriladi.

Moliya vazirligi, Oliy va o‘rta maxsus ta’lim vazirligi bilan birgalikda ikki oy muddatda Davlat oliy ta’lim muassasalarining magistratura bosqichiga to‘lov-kontrakt asosida qabul qilingan va ta’lim olayotgan xotin-qizlarning to‘lov-kontrakt summasini davlat budjeti mablag‘lari hisobidan qoplab berish tartibini tasdiqlash uchun Vazirlar Mahkamasiga kiritadi.

Eslatib o‘tamiz, 2021/2022-o‘quv yili uchun davlat buyurtmasi parametrlariga ko‘ra bakalavrlar tayyorlash bo‘yicha (kunduzgi ta’lim shakliga) — 113 530 ta kvota ajratilgan edi.