Навоий вилоятида спорт анжомларини қиммат нархларда харид қилиш ҳолатлари аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Навоий вилояти бошқармаси томонидан терговга қадар текширув ўтказилган. Унда вилоят Халқ таълими бошқармаси ва «И.А.» МЧЖ моддий жавобгар шахслари «Давлат харидлари тўғрисида»ги қонун талабларига зид равишда 8 турдаги спорт анжомини ҳақиқий баҳосидан 787,8 миллион сўмга қиммат нархларда харид қилгани аниқланган.
Шунингдек, Навоий шаҳар бўлими томонидан терговга қадар текширув ўтказилган. Унда вилоятнинг собиқ Туризм ва спорт бош бошқармаси моддий жавобгар шахслари 2021 йилнинг декабрь ойида 22 турдаги спорт анжомлари ҳақиқий баҳосидан 598,9 миллион сўмга қиммат нархларда сотиб олгани аниқланган. Оқибатда давлат ва жамият манфаатларига жуда кўп миқдорда зарар етказилган.
Бошқа ҳолатда ўтган йилнинг декабрь ойида 8 нафар ўқувчининг Москва шаҳрига халқаро мусобақага бориб-келиш харажатларини ота-оналар томонидан тўлаб берилган. Шунга қарамай, сохта ҳужжатлар расмийлаштирилиб 80 миллион сўм бюджет маблағи ўзлаштириш йўли билан талон-торож қилинган.
Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 205-моддаси (ҳокимият ёки мансаб ваколатини суиистеъмол қилиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)