Ўзбекистондаги мавжуд 159 та олий таълим муассасасида таҳсил олаётган 837 минг 774 нафар талабанинг 106 минг 729 нафари иш билан банд қилинган. Бу ҳақда Бандлик ва меҳнат муносабатлари вазирлиги ташаббуси билан ташкил этилган пресс-турда маълум қилинди.
Вазирлик ахборот хизмати раҳбари Мавжуда Мирзаеванинг ОАВ вакилларига маълумот беришича, президент Шавкат Мирзиёев раислигида 2022 йилнинг 4 март куни бўлиб ўтган видеоселекторда ишлашга эҳтиёжи бор талабаларга ёрдам бериб, уларнинг бандлигини таъминлаш шартлиги белгилаб берилган. Шундан сўнг вазирлик ва вазирлик таркибидаги ташкилотлар томонидан бу масалага жиддий эътибор қаратилган.
«Республикамиздаги мавжуд 105 та давлат, 24 та нодавлат ва 30 та хорижий олий таълим муассасаларида вазирлик таркибидаги ташкилотлар билан ҳамкорликда талабаларни ишга жойлаштиришга кўмаклашувчи бандлик марказлари ташкил этилди. Ва айни кундаги ҳолат ўрганиб чиқилганда мавжуд 837 минг 774 нафар талабанинг 106 минг 729 нафари яъни 13,4 фоизи ўқиш билан биргаликда иш билан ҳам банд қилингани маълум бўлди. Биз бугунги пресс-туримизда Тошкент шаҳридаги ОТМларда талабаларнинг ишга жойлашиш кўрсаткичларини ўрганяпмиз», — дейди Мавжуда Мирзаева.
Масъулнинг маълумот беришича, айни кунда Тошкент шаҳридаги ОТМларда таҳсил олувчи талабаларнинг 30 минг 527 нафари иш билан банд қилинган.
Тошкент Молия институти масъулларининг айтишича, президент топшириғидан сўнг институтда 45 нафар талаба ОТМнинг ўзига ишга жойлаштирилган. Бундан ташқари институт ҳудудида сартарошхона, гўзаллик салонлари ташкил қилиниб, талабаларнинг ишга жойлашиши амалга оширилган.
Ал-Хоразмий номидаги Тошкент ахборот технологиялари университети масъули Акбар Нормуродовнинг маълумот беришича, президент топшириғидан сўнг университетнинг 364 нафар талабаси ишлаш иштиёқини билдирган. Айни кунгача 329 нафар талаба ишга жойлаштирилган.
Изоҳ (0)