Navoiy viloyatida sport anjomlarini qimmat narxlarda xarid qilish holatlari aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Navoiy viloyati boshqarmasi tomonidan tergovga qadar tekshiruv o‘tkazilgan. Unda viloyat Xalq ta’limi boshqarmasi va “I.A.” MCHJ moddiy javobgar shaxslari “Davlat xaridlari to‘g‘risida”gi qonun talablariga zid ravishda 8 turdagi sport anjomini haqiqiy bahosidan 787,8 million so‘mga qimmat narxlarda xarid qilgani aniqlangan.
Shuningdek, Navoiy shahar bo‘limi tomonidan tergovga qadar tekshiruv o‘tkazilgan. Unda viloyatning sobiq Turizm va sport bosh boshqarmasi moddiy javobgar shaxslari 2021-yilning dekabr oyida 22 turdagi sport anjomlari haqiqiy bahosidan 598,9 million so‘mga qimmat narxlarda sotib olgani aniqlangan. Oqibatda davlat va jamiyat manfaatlariga juda ko‘p miqdorda zarar yetkazilgan.
Boshqa holatda o‘tgan yilning dekabr oyida 8 nafar o‘quvchining Moskva shahriga xalqaro musobaqaga borib-kelish xarajatlarini ota-onalar tomonidan to‘lab berilgan. Shunga qaramay, soxta hujjatlar rasmiylashtirilib 80 million so‘m budjet mablag‘i o‘zlashtirish yo‘li bilan talon-toroj qilingan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 205-moddasi (hokimiyat yoki mansab vakolatini suiiste’mol qilish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Mavzuga doir:
Izoh (0)