Олий Мажлис Қонунчилик палатасида 17 май куни Ўзбекистон Либерал-демократик партияси ҳамда Ўзбекистон «Миллий тикланиш» демократик партияси фракцияларининг қўшма йиғилиши бўлиб ўтди, деб хабар бермоқда «Дарё» мухбири.
Қўшма йиғилишда ЎзЛиДеП фракцияси томонидан Ўзбекистон конституциясини такомиллаштириш долзарб аҳамият касб этиши таъкидлаб ўтилди. «Миллий тикланиш» партиясининг фракцияси аъзолари ЎзЛиДеП фракцияси томонидан конституцияни такомиллаштириш бўйича илгари сураётган таклифини тўлақонли қўллаб-қувватлашини билдирди.
Шунингдек, фракция аъзолари конституцияни такомиллаштиришга қаратилган аниқ нормалар барча фуқаролар, жамоатчилик вакиллари ҳамда халқимизнинг таклиф ва фикрлари асосида шаклланиши, бунда очиқлик ва шаффофлик таъминланишини зарурлигини билдирди.
Қўшма йиғилиш якунида конституцияни такомиллаштириш масаласини Олий Мажлис палаталари кенгашларига киритишга келишиб олиниб, конституцияга ўзгартириш ва қўшимчалар киритиш борасидаги қарор лойиҳаси депутатлар томонидан маъқулланди.
Эслатиб ўтамиз, 16 май куни Олий Мажлис Қонунчилик палатасида ўтказилган йиғилишда Ўзбекистон Либерал-демократик партияси конституцияга ўзгартириш ва қўшимчалар киритиш жараёнини бошлаш таклифи билан чиққан эди.
Шавкат Мирзиёев 8 декабрь — Конституция байрами муносабати билан Ўзбекистон халқига йўллаган табригида мамлакат асосий қомусига ўзгартиришлар киритилиши мумкинлиги ҳақида гапирганди.
Изоҳ (0)