Oliy Majlis Qonunchilik palatasida 17-may kuni O‘zbekiston Liberal-demokratik partiyasi hamda O‘zbekiston “Milliy tiklanish” demokratik partiyasi fraksiyalarining qo‘shma yig‘ilishi bo‘lib o‘tdi, deb xabar bermoqda “Daryo” muxbiri.
Qo‘shma yig‘ilishda O‘zLiDeP fraksiyasi tomonidan O‘zbekiston konstitutsiyasini takomillashtirish dolzarb ahamiyat kasb etishi ta’kidlab o‘tildi. “Milliy tiklanish” partiyasining fraksiyasi a’zolari O‘zLiDeP fraksiyasi tomonidan konstitutsiyani takomillashtirish bo‘yicha ilgari surayotgan taklifini to‘laqonli qo‘llab-quvvatlashini bildirdi.
Shuningdek, fraksiya a’zolari konstitutsiyani takomillashtirishga qaratilgan aniq normalar barcha fuqarolar, jamoatchilik vakillari hamda xalqimizning taklif va fikrlari asosida shakllanishi, bunda ochiqlik va shaffoflik ta’minlanishini zarurligini bildirdi.
Qo‘shma yig‘ilish yakunida konstitutsiyani takomillashtirish masalasini Oliy Majlis palatalari kengashlariga kiritishga kelishib olinib, konstitutsiyaga o‘zgartirish va qo‘shimchalar kiritish borasidagi qaror loyihasi deputatlar tomonidan ma’qullandi.
Eslatib o‘tamiz, 16-may kuni Oliy Majlis Qonunchilik palatasida o‘tkazilgan yig‘ilishda O‘zbekiston Liberal-demokratik partiyasi konstitutsiyaga o‘zgartirish va qo‘shimchalar kiritish jarayonini boshlash taklifi bilan chiqqan edi.
Shavkat Mirziyoyev 8-dekabr — Konstitutsiya bayrami munosabati bilan O‘zbekiston xalqiga yo‘llagan tabrigida mamlakat asosiy qomusiga o‘zgartirishlar kiritilishi mumkinligi haqida gapirgandi.
Izoh (0)