Ўзбекистон ва Тожикистон ўртасида туризм соҳасида 40 дан ортиқ меморандум имзоланди

Тожикистоннинг Хўжанд ва Панжикент шаҳарларида 5—7 май кунлари инфотур ташкил этилди. Бу ҳақда Туризм ва маданий мерос вазирлиги хабар қилди.

Қайд этилишича, инфотурда ўзбекистонлик 30 та туроператордан иборат делегацияси қатнашган. Ташриф давомида Хўжанд ва Панжикент шаҳарларидаги энг нуфузли меҳмонхона ва санаторийларнинг имкониятлари ўрганиш режалаштирилган. Форумда режага киритилган дастурдан чиқмаган ҳолда туроператорлар жами 15 тага яқин меҳмонхона ва санаторийларнинг шароитлари ва имкониятларини шахсан бориб кўрган.

Томонлар ўзаро манфаатли алоқаларни кенгайтириш мақсадида туризм соҳасида минтақавий ҳамкорликни ривожлантириш истиқболларини муҳокама қилган. Иккала мамлакат сайёҳлик компаниялари вакиллари ҳам пандемиядан кейинги даврда сайёҳлик хизматлари нархларининг мавжудлиги ҳақида фикр алмашган. Туристик объектларга ташриф ва конференция вақтида B2B учрашувлар икки томон учун ташкил этилган. Натижада Ўзбекистон ва Тожикистон туроператорлари 40 дан ортиқ ўзаро ҳамкорлик алоқаларини ўрнатиш тўғрисидаги меморандумлар имзолаган.

Шунингдек, инфотур давомида Тожикистондаги қишлоқларда тўхтаб ўтилиб мамлакатнинг гастрономик имкониятлари туроператорлар томонидан ўрганилган.