Олий Мажлис депутати Фан, таълим, маданият ва спорт масалалари қўмитаси аъзоси, ёшлар масалалари бўйича комиссия аъзоси Шаҳноза Холмаҳаматова сурхондарёлик зўравон ўқитувчи борасида фикр билдириб, «Муштумзўр ўқитувчилар билан узоққа бора олмаймиз», демоқда.

Ўқитувчи боксчилардек аямасдан ўз ўқувчисини дўппослаган. Ахир жазолашнинг тажрибада синалган, илмий исботланган кўплаб усуллари бор-ку. Бу ҳақда гапиравериб чарчадик. Мазкур вазиятда фақатгина ўқитувчини айблашдан йироқман. Бу ҳолат олдин ҳам такрорланмаганига ҳеч ким кафолат беролмайди. Зўравон ўқитувчи қаторида мактаб маъмуриятини ҳам бирдек айбдор ҳисоблайман. Негаки ўқитувчининг бу каби қилиқларига ўз вақтида чора кўрганида бугунгидек хунук ҳолат кузатилмасди. Ёмон иллат бир соатда ёки бир кунда шаклланиб қолмайди.

Педагог деган улуғ номга доғ тушираётган бу каби муштумзўр ўқитувчиларни ўқитувчилик қилиш имкониятидан ва шарафидан маҳрум қилиш тарафдориман. Болани уриб-тепиб таҳқирлаётган бу акамизнинг руҳий ҳолатини ҳам обдон текшириш ва бу ҳолатни чуқурроқ ўрганиб, ҳуқуқий баҳо бериш лозим деб ҳисоблайман.

Агар ўқитувчи маҳоратли ва билимли бўлса, ўқувчиларни урмасдан, тепмасдан, қўрқитмасдан ҳам ўз фанига қизиқтира олади. Биз ҳам ўқувчи бўлганмиз. Буни яхши биламиз. Бугунги шиддатли даврда фарзандларимизни ваҳшийликлардан, зўравонликлардан ҳимоя қилиб, ишончини қозониб, уларни тўғри йўналтириб, меҳр ва муҳаббат кўрсатишда ўрнак бўлолмасак, уларни ҳам, келажакни ҳам йўқотамиз. Фарзандларимизни мантиқий фикрлашга, ўз фикрларини эркин ифодалашга ўргатиш муҳим бўлган бир даврда калтаклардан танига ҳам, руҳиятига ҳам жароҳат бериб ўзини устоз деб юрган баъзи ўқитувчиларимизга юқоридаги ҳолатдан хулоса қилишларини сўраймиз.

Шаҳноза Холмаҳаматова

Аввалроқ Сурхондарё вилоятининг Бандихон туманидаги 4-сонли умумтаълим мактабида ўқитувчи ўқувчини аёвсиз калтаклаётгани кўринган видео тарқалди. «Дарё» сўровига жавобан мазкур ҳолатни изоҳлаган Сурхондарё вилоят халқ таълими бошқармаси ахборот хизмати зўравон ўқитувчи ва мактаб директори туман ИИБга олиб кетилганини маълум қилди. Сўнгра ҳолатга Бош прокуратура эътибор қаратиб, ҳолат ўрганилаётганини, ҳолатга ҳуқуқий баҳо берилишини, вазият вилоят прокуратураси назоратида эканини билдирди.

Кейинроқ эса зўравон инглиз тили ўқитувчиси билан биргаликда мактаб директорининг маънавий-маърифий ишлар бўйича ўринбосари ҳам ишдан олингани хабар берилди. Халқ таълими вазирлиги эса ўқитувчининг ўқувчиларни калтаклашини кескин қоралаб муносабат билдирди.

«Дарё»га ўрганиш хулосалари ҳақида маълумот берган вилоят халқ таълими бошқармаси калтакланган ўқувчи воқеаси ортидан директорнинг ўқув ишлари бўйича ўринбосари, шунингдек ўқувчининг синф раҳбари ҳам ишдан олинганини, мактаб директори  бўшаш ҳақида ариза ёзганини маълум қилди.