Сурхондарё вилоятининг Бандихон туманида ўқитувчиси томонидан калтакланган ўқувчи воқеаси ортидан ўқувчининг синф раҳбари ҳам ишдан олинди. Мактаб директори бўшаш ҳақида ариза ёзди. Бу ҳақда вилоят халқ таълими бошқармасининг расмий ахборотида маълум қилинган.
Аниқланишича, калтакланган ўқувчи воқеаси 2022 йил 27 апрель (Бош прокуратура ахборотида 22 апрель дейилган) куни содир бўлган бўлиб, 15 май куни интернетда тарқалган.Инглиз тили фани ўқитувчиси Й.Ш 2022 йил 27 апрель куни дарс жадвали асосида 9-«Б» синф ўқувчиларига дарс ўтган. Машғулот давомида 9-«Б» синф раҳбари Э.Ж синфхонага кириб келиб, 9-«Б» синф ўқувчиларининг ўзаро жанжалини ижтимоий тармоқда ким тарқатганини муҳокама қилган. 9-«Б» синф ўқувчиси Х.И., синф раҳбари Э.Ж ва инглиз тили фани ўқитувчиси Й.Ш.га гап қайтаргани учун Й.Ш жаҳл устида ўқувчини калтаклаган. Ушбу ҳолат 9-«Б» синф ўқувчилари томонидан видеога олинган ва 15 май куни ижтимоий тармоқларда тарқатилган. Масала бўйича туман ҳокимлиги, туман прокуратураси, ички ишлар бўлими ва туман халқ таълим бўлими масъул ходимлари томонидан мактабда ўрганиш ўтказилиб, педагог жамоа аъзолари ва ўқитувчилар билан таълим-тарбия жараёни бўйича суҳбатлашилган. Ҳамда 2022 йил 27 апрель куни содир бўлган воқеага аниқлик киритилди, — дейилади расмий муносабатда.
Айтилишича, ўрганиш ишлари давомида мактабнинг 9-«А» синф ўқувчилари фикри ҳам ўрганилган бўлиб, улар 9-«Б» синф ўқувчиларининг одоб-ахлоқ қоидаларига риоя қилмаслигини, тенгдошлари билан кўп жанжал қилишини маълум қилган.
«Айнан ушбу ўқувчиларнинг ота-оналарига фарзандларининг хулқи ва дарсга тайёрланмасдан келиши юзасидан алоҳида кўрсатмалар ҳамда тавсиялар бериб борилган», — дейилади бошқарма ахборотида.
Мактабда таълим-тарбия ишлари ҳамда педагог ходимларнинг одоб-ахлоқ қоидалари, ички меҳнат тартиб қоидаларига амал қилишини етарли равишда назорат қилмаганлиги учун 4-мактаб директори Х.Б.дан меҳнат шартномасини бекор қилиш тўғрисида бошқарма бошлиғи номига ариза олинган.
Видеода ўқувчисининг калтакланишини томоша қилиб турган 9-«Б» синф раҳбари Э.Ж. билан тузилган меҳнат шартномаси ҳам белгиланган тартибда бекор қилинган. Шунингдек, директорнинг ўқув ишлари бўйича ўринбосари Н.А ҳам ишдан олинган.
Аввалроқ ўқувчига зўравонлик қилган ўқитувчи ва мактаб директорининг маънавий-маърифий ишлар бўйича ўринбосари ишдан олингани ҳақида хабар берилганди.
Изоҳ (0)