Ijtimoiy tarmoqlarda Surxondaryo viloyatining Bandixon tumanidagi maktablarning birida o‘qituvchi o‘quvchini kaltaklayotgani aks etgan video tarqaldi. “Daryo” so‘roviga javoban holatni izohlagan viloyat xalq ta’limi boshqarmasi axborot xizmati zo‘ravon o‘qituvchi va maktab direktori tuman IIBga olib ketilganini ma’lum qildi.

Aniqlanishicha, voqea Bandixon tumanidagi 4-sonli umumta’lim maktabida sodir bo‘lgan.

“Biz ham voqea joyiga ketyapmiz. Tez orada holatga aniqlik kiritib, bu holat nega sodir bo‘lgani hamda voqea ishtirokchisi bo‘lgan o‘qituvchi nega bu darajagacha borgani haqida ma’lumot beramiz”, — deydi “Daryo” so‘roviga javob bergan viloyat xalq ta’limi boshqarmasi axborot xizmati rahbari Rustam Jo‘rayev.

Rustam Jo‘rayev videoda IIB xodimi kiyimida ekani taxmin qilinayotgan zo‘ravon o‘qituvchi ekanini, IIB xodimi emasligini aytmoqda.

“Yo‘q, bu kishi o‘qituvchi, IIB xodimi emas. Lekin aynan qaysi fan o‘qituvchisi va ism-sharifi nima, bu haqda hozircha bizda aniq ma’lumot yo‘q. Biroq tez orada aniqlashtiramiz”, — deydi mas’ul.

Viloyat xalq ta’limi boshqarmasi axborot xizmati rahbarining qo‘shimcha qilishicha, mazkur voqea ayni paytda tuman IIB tomonidan o‘rganilmoqda.

“Maktab direktori va shu o‘qituvchi tuman IIBga chaqirilgan ekan. Biz ham voqea joyiga endi boramiz”, — deydi Rustam Jo‘rayev.

Avvalroq Andijonda o‘qituvchi darsga kechikib kelgan o‘quvchiga ariq suvini ichirib jazolagani, keyinchalik qilmishi uchun uzr so‘rab chiqqani xabar berilgan. Sirdaryo viloyatining Guliston shahrida esa o‘qituvchi va maktab direktori o‘rinbosari o‘quvchining yaqinlari tomonidan kaltaklangani, keyinchalik zo‘ravonlarga uch sutka qamoq jazosi tayinlangani xabar berilgandi.