Шавкат Мирзиёев Бирлашган Араб Амирликлари президенти Шайх Халифа бин Зоид-ал Наҳаён вафоти муносабати билан таъзия маросимида иштирок этиш учун Абу-Дабига жўнаб кетганди.
Президент матбуот котиби Шерзод Асадов давлат раҳбари БААнинг янги президенти Муҳаммад бин Зоид-ал Наҳаён, ташқи ишлар вазири Абдулла бин Зоид-ал Наҳаён ҳамда бош вазир ўринбосари, президент ишлари бўйича вазир Мансур бин Зоид-ал Наҳаён билан учрашиб, уларга таъзия билдирганини маълум қилди.
Қайд этилишича, таъзия маросимида Франция президенти Эммануэль Макрон, Буюк Британия бош вазири Борис Жонсон, Қозоғистон президенти Қосим-Жўмарт Тўқаев, Туркманистон халқ маслаҳати раиси Гурбангули Бердимуҳамедов, Миср президенти Абдулфаттоҳ ас-Сиси, Покистон бош вазири Шаҳбоз Шариф, Уммон султони Ҳайсам бин Ториқ, Исроил бош вазири Нафтали Беннет жами 40 га яқин давлат ва ҳукумат раҳбарлари қатнашди.
БАА президенти ва Абу-Даби амири Халифа ибн Зайд ал-Наҳаён узоқ давом этган хасталикдан сўнг 13 май куни 73 ёшида вафот этганди. У 2014 йилда инсультни ва жиддий операцияни бошидан кечирган. Шундан кейин у омма олдида камдан кам намоён бўлган. Сўнгги йилларда БАА президенти давлат ишлари билан деярли шуғулланмади, мамлакатни бошқаришни пойтахт амирлиги Абу-Даби валиаҳд шаҳзодаси Муҳаммад ибн Зайдга топшириб қўйганди. У БАА асосчиси Зайд ал-Наҳаённинг тўнғич ўғли эди.
14 май куни унинг укаси, Абу-Даби валиаҳд шаҳзодаси шайх Муҳаммад ибн Зоид-ал Наҳаён мамлакатнинг янги президенти этиб сайланди.
Изоҳ (0)