Бирлашган Араб Амирликлари Олий федерал кенгаши 14 май, шанба куни Абу-Даби валиаҳд шаҳзодаси, марҳум президент Халифа ибн Зайд Ол-Наҳаённинг укаси шайх Муҳаммад ибн Зайд Ол-Наҳаённи мамлакатнинг янги президенти этиб сайлади. Бу ҳақда WAM миллий ахборот агентлиги хабар берди.
Таъкидланишича, кенгаш бир овоздан Абу-Даби валиаҳд шаҳзодасини Бирлашган Араб Амирликлари президенти деб сайлаган. Кенгаш мажлисига вақтинчалик давлат раҳбари вазифасини бажараётган вице-президент ва бош вазир, Дубай амирлиги ҳукмдори шайх Муҳаммад ибн Рашид ал-Мактум раҳбарлик қилган.
Эслатиб ўтамиз, Бирлашган Араб Амирликлари президенти ва Абу-Даби амири Халифа ибн Зайд Ол-Наҳаён 13 май куни узоқ давом этган касалликдан сўнг 73 ёшида вафот этди.
Сўнгги йилларда БАА президенти давлат ишлари билан деярли шуғулланмасди, мамлакатни бошқаришни пойтахт амирлиги Абу-Даби валиаҳд шаҳзодаси Муҳаммад ибн Зайдга топшириб қўйганди.
Марҳум Халифа ибн Зайд Ол-Наҳаён БАА асосчиси Зайд Ол-Наҳаённинг тўнғич ўғли бўлган бўлса, шайх Муҳаммад ибн Зайд Ол-Наҳаён унинг учинчи ўғлидир.
Изоҳ (0)