Эроннинг турли шаҳарларида озиқ-овқат нархи ошиб кетгани ва баъзи маҳсулотлар танқислиги туфайли норозилик намойишлари давом этмоқда, деб хабар беради Anadolu агентлиги.
Эронда ҳукумат томонидан субсидиялар бекор қилинганидан кейин асосий озиқ-овқат маҳсулотлари қимматлашганига қарши норозиликлар мамлакатнинг турли вилоятларини қамраб олди.
Норозилик акциялари Луристон вилоятининг Буружард ва Дуруд, Чаҳормаҳол ва Бахтиёрий вилоятининг Жункан ва Фарсон, Кўҳгилуя ва Буйир-Аҳмад вилоятининг Даҳдашт шаҳарларида бўлиб ўтди.
Ижтимоий тармоқларга жойланган кадрларда Бурусард ва Фарсон шаҳарларида мамлакат ҳукуматига қарши шиорларни баралла айтаётган намойишчиларга қарши хавфсизлик кучлари кўзни ёшлантирувчи газдан фойдалангани ва ўт очганини кўриш мумкин.
Ички ишлар вазири Аҳмад Воҳидий давлат телевидениесида нутқ сўзлаётиб, намойишлар кенг кўламли бўлмаганини маълум қилди: «Бизнинг одамларимиз душманлар чақириғига жавоб қилмади. Бир неча ўнлаб кишилар тўпланди, холос».
Эроннинг IRNA давлат агентлиги хабарига кўра, мамлакатда йилига субсидия кўринишида жами 900 триллион туман (тахминан 30 миллиард доллар) пул тўланади.
Эрон президенти Иброҳим Раисий 9 май куни иқтисодий инқирозга қарши кураш доирасида энг зарур маҳсулотларга субсидиялар тўхтатилишини эълон қилди. Натижада мамлакатда нархлар ошиши кузатилди.
Ўз баёнотида Раисий анъанавий Эрон нони, дори ва бензин нархлари ўзгармаслигини маълум қилди. Шунга қарамай, маҳаллий матбуотда нон нархи 3 баробаргача ошгани ҳақида хабарлар пайдо бўлди. Ёғ, тухум ва товуқ гўшти қарийб тўрт баробар қимматлашган бўлса, баъзи маҳсулотлар умуман танқис бўлиб қолди.
Асосий маҳсулотлар нархи ўсиши туфайли аҳолиси асосан араблар бўлган Хузистон вилоятининг Дизфол, Ондимашк, Изи шаҳарларида, шунингдек, Кўҳгилуя ва Буйир-Аҳмад вилоятининг Ясук шаҳрида намойишлар авж олди.
IRNA маълумотларига кўра, ўтган тунда Дизфўл шаҳридаги намойишларга раҳбарлик қилган 15 киши ҳамда Ясук шаҳрида «жамоат мулкига зарар етказиш мақсадида намойишчиларни манипуляция қилишга уринган» 7 киши ҳибсга олинган.
Намойишлар бўлиб ўтган шаҳарларда интернетдан фойдаланиш чекланган. Лондоннинг интернетдан глобал фойдаланишни кузатиб борувчи Нетблоcк веб-сайти Эронда интернет-хизматлари чекланганини тасдиқлади.
Изоҳ (0)